በፎርጅድ ክህነት ሲያወናብድ የነበረው ማቁ ዶ/ር መስፍን ተገኝ “ክህነቱን” ተገፈፈ፣ ከአገልግሎትም ታገደ

 Click here for PDF
የማህበረ ቅዱሳን ዋናዎች ከሚባሉትና በሰሜን አሜሪካ ከኢትዮጵያ ኦርቶዶክስ ተዋሕዶ ቤተክርስቲያን በመገንጠል “ቤተክርስቲያንን” እንደ ኪዎስክ እየከፈቱ በሰሜን አሜሪካ ቤተክርስቲያናችን እንድትከፋፈል ትልቅ ስራ እየሰሩ ካሉት ባለፎርጅድ ክህነት የማህበረ ቅዱሳን ሰዎች አንዱ የሆነው ዶ/ር መስፍን ተገኝ፣ ለጊዜው ከየት እንዳመጣው ያልታወቀው “ክህነቱ” መገፈፉን አባ ሰላማ ድረገጽ ዘገበ። ድረገጹ ይፋ ያደረገው የማገጃ ደብዳቤ አክሎም ዶ/ሩ የቤተክርስቲያን አባቶችንና ምእመናንን ለማለያየትና ለማጋጨት አድማ በማነሳሳትና በመቀስቀስ የተጠመደበትን “አገልግሎቴ” የሚለውን አጋንንታዊ ተግባሩን እንዳይቀጠል እግድ እንደጣለበት ይፋ አድርጓል። 

ዶ/ሩን ያገዱት ማህበረ ቅዱሳን ከምንኩስና እስከ ጵጵስና፣ ከሀዋሳ እስከ ሰዋስወ ብርሃን ቅዱስ ጳውሎስ መንፈሳዊ ኮሌጅ ድረስ ያሳደዳቸው አሁንም የሚያሳድዳቸው ብፁዕ አቡነ ፋኑኤል ናቸው። ብፁዕነታቸው ከዚህ ቀደም ከሀዋሳ ለቀው በነበረበት ጊዜ የትኛው ሀገረ ስብከት ቢመደቡ ይሻላል ተብለው ቢጠየቁ፣ “ማህበረ ቅዱሳን የሌለበት” እንዳሉ ይነገርላቸዋል። ለዚያም ነው የሰዋስወ ብርሃን መንፈሳዊ ኮሌጅ ዲን ሆነው ተሾመው የነበረው። ከዚያም በሰሜን አሜሪካ የካሊፎርኒያና የዋሽንግተን ዲሲ ሊቀጳጳስ ሆነው ሲሾሙ ማህበረ ቅዱሳን ውጪ ባስቀመጣቸው ወኪሎቹ በእነ ዶ/ር መስፍንና በነብርሃኑ ጎበና የተለመደውን ተቃውሞ በማስነሳት በየድረገጾቹ ከፍተኛ የስም ማጥፋት ዘመቻ ያወጀባቸው መሆኑ ይታወቃል።

ሳኦል የዳዊት የእድሜ ልክ ጠላት እንደሆነ ሁሉ ማህበረ ቅዱሳንም የብፁእ አቡነ ፋኑኤል የእድሜ ልክ ሊባል ለሚችል ጊዜ ጠላታቸው ሆኖ እያሳደዳቸው የሚገኝ ሲሆን፣ በአሳዳጅነቱ ገፍቶበትና አሜሪካ ድረስ ተከትሎ ብዙ ሊዋጋቸው ሞክሯል። ግን አልተሳካለትም። በዚህ እጅግ የተበሳጨው ማህበሩ ለዶ/ሩ ተልእኮ ሰጥቶ የመጨረሻው የሚባለውን ጥይት ለመተኮስ ከቀኖና ቤተክርስቲያን ውጪ መንቀሳቀሱ ታውቋል። ብፁዕነታቸውም “ቀሲስ” ተብዬውን ዶክቶር ከክፉ ድርጊቱ እንዲታቀብ ማስጠንቀቂያ መጻፋቸው ታውቋል። ዶክተሩ ግን በእንቢተኝነት የገፋባት ሲሆን ብጹዕነታቸውንም በመቃወም የቤተክርስቲያንን ቀኖና ጥሷል። በዚሁ መሠረት ፍትሕ መንፈሳዊን ጠቅሰው ባላቸው ስልጣንና የቤተክርስቲያን ታላቅ ሃላፊነት የዶክተሩን የመንደር ውስጥ ክህነት ገፈው ከአገልግሎት አግደውታል። 

በብፁዕነታቸው የተወሰደው ይህ እርምጃ እጅግ የሚደገፍ የሚበረታታና በህገ ቤተክርስቲያን የተፈጸመ በመሆኑም ተገቢ ነው። በአገር ውስጥም ቤተክርስቲያንን እያተራመሱና እያወኩ የሚገኙትን የመንደር ውስጥ ህግወጥ ተሿሚ የማህበረ ቅዱሳን “ዲያቆናት”፣ “ቀሳውስት” “ሊቀ ምንትሶች” ከየት እንደመጣ የማይታወቀውን ለቅዳሴ ሳይሆን ቤተክርስቲያንን ለማወክ ሽፋን ያደረጉትን “ሥልጣነ ክህነታቸውን” እና “ማእረጋቸውን” መግፈፍ የሚገባ መሆኑን ብዙዎች ይናገራሉ። ማህበሩ ህዝቡን የሚያታልልበት አንዱ መንገድ ይህ ስለሆነ፣ ከየትም ያምጣው ከየት “ክህነትህ ህገወጥ ነው” ያለውን ሁሉ ከማጥቃት እንደማይመለስ ከዚህ ቀደም አባ ሠረቀን በመክሰስ ያሳየ መሆኑ የሚታወስ ነው። እንደ ብፁዕ አቡነ ፋኑኤል እነዚህን በቤተክርስቲያን ስርአተ ትምህርት ውስጥ ሳያልፉና አፋቸውን በቤተክርስቲያን ቋንቋ ሳይፈቱ፣ ፎርጂድ ዲያቆናት ቀሳውስትና ሊቀ ምንትሶችን ማገድና አለን የሚሉትንና ምንጩ ያልታወቀውን “ስልጣነ ክህነት” መግፈፍ ያስፈልጋል።

ደ/ር መስፍን የታገደበትን ደብዳቤ ለማንበብ ይህንን ይጫኑ