የማህበረ ቅዱሳን ከፍተኛ “ግልጽ” አመራሮች “ብፁዕ ወቅዱስ አቡነ ጳውሎስ ተለውጠውብናል” ሲሉ አማረሩ

Click here for PDF

• ብፁዕ ወቅዱስ አቡነ ጳውሎስም “ደግሞ ምን ልታደርጉ መጣችሁ?” ብለዋቸዋል 

በየድረገጾቹ ስማቸውን ክፉኛ እያብጠለጠለ፣ ከስልጣናቸውን እንዲለቁም ልዩ ልዩ ቅስቀሳና ፕሮፓጋንዳ እየነዛባቸው በህዝበ ክርስቲያኑ ዘንድ እንዲጠሉ በማድረጉ የአንበሳውን ድርሻ የሚወስደው ማህበረ ቅዱሳን፣ በትናንትናው ዕለት ከፍተኛ አመራሮቹን ወደብፁዕ ወቅዱስ አቡነ ጳውሎስ ፓትርያርክ ርእሰ ሊቃነ ጳጳሳት ዘኢትዮጵያ ልኮ እንደነበረ የቤተክህነት ምንጮቻችን ገለጹ። ማህበሩ ከመንግስት ፖለቲከኞች በኩል አለኝ የሚለውን አቶ ካሳሁንን ጨምሮ ሌሎቹንም የማህበሩን ስውር ሳይሆን ግልጽ አመራሮች ወደቅዱስነታቸው የላከው፣ ቅዱስነታቸውን ለመውቀስ ነው ተብሏል።

በዚሁ መሠረት አመራሮቹ ቅዱስነታቸው እንደ ከዚህበፊቱ እንዳልሆኑላቸውና እንደተለወጡባቸው፣ እየራቋቸውም መሆኑን በተለመደው መቅለስለስ ለቅዱስነታቸው ያስረዱ ሲሆን፣ በዚህ ወቅት ለማህበሩ እንቅስቃሴ ከማንም በላይ የቅዱስነታቸው ድጋፍ አስፈላጊ መሆኑን አበክረው አስረድተዋቸዋል።

ቅዱስነታቸውም ከማህበሩ የቀረበባቸውን ወቀሳ ካዳመጡ በኋላ፣ “ለመሆኑ ምን ልታደርጉ መጣችሁ? በየዌብሳይቱ፣ በየጋዜጣውና በየመጽሄቱ ታስተላልፉት የነበረውን ሀሜታችሁንና ስድባችሁን ጨረሳችሁ ወይ? አሁን ደግሞ እኔን ይዛችሁ ምን ልትሰሩ አስባችሁ ነው የመጣችሁት?” በማለት ለማህበሩ አመራሮች ተግሳጽ አዘል ምላሽ ሰጥተዋቸዋል። የማህበሩ የክፋት አሰራር በእርሳቸው ላይ ምንም ሊያደርጋቸው እንደማይችልና የቤተክርስቲያኒቱ መሪ አድርጎ ያስቀመጣቸው አምላክ ፍቅሩንና ጥበቃውን እንዳላራቀባቸውም ቅዱስነታቸው ሳያስገነዝቡ እንዳላለፉ ምንጮቻችን ገልጸዋል።

በማህበሩ ቆስቋሽነትና በሃይማኖት ሽፋን በተለያዩ ቦታዎች የተነሳው ብጥብጥና ረብሻ በቀላሉ የሚታይ እንዳልሆነ የተናገሩት ቅዱስነታቸው፣ እየሆነ ያለው ሁሉ እንደ ከዚህ በፊቱ በቸልታ የማይታለፍ መሆኑን ለአመራሮቹ ነግረዋቸዋል ተብሏል። “ትማራላችሁ፣ ትሻሻላላችሁ ብለን ነው እንጂ የምታደርጉት ነገር ሁሉ ከማንም የተሰወረ አይደለም።” ሲሉም ማህበሩ በስውር እየሰራ ያለውንና በቤተክርስቲያኒቱ ብሎም በአገር ላይ ብጥብጥ ለመፍጠር እየሄደበት ያለውን አደገኛ አካሄድ ሁሉ እንደሚያውቁ ገልጸውላቸዋል።

የማህበሩ ሰዎች ነጻ የሆኑ ሲመስላቸው ብቻቸውን ይሮጡ እንደነበርና እንደእባብ ያገኙትን ለመንደፍ እንደሚሽሎከለኩ የተነገራቸው ሲሆን፣ ከሚያደርጉት አንዳንድ ህገወጥ እንቅስቃሴ አንጻር ስርአት እንዲይዙ አስገዳጅ ሁኔታ ሲፈጠርባቸውና ከማንም እንዳልተሰወሩ ሲገባቸው፣ እንደማያዋጣቸውም ሲያውቁ ደግሞ ስልታዊ ማፈግፈግ በማድረግ እንደሚቅለሰለሱ፣ በዚህ መንገድ መጓዝ የትም እንደማያደርሳቸውና እንደማያዋጣቸው ተነግሯቸዋል ተብሏል።

ማህበረ ቅዱሳን “ድል የቀናው” ሲመስለው ቅዱስነታቸውን ከመዝለፍና ከማዋረድ እንደማይመለስ በየድረገጾቹም ከፍተኛ የስም ማጥፋት ዘመቻ እንደሚከፍትባቸው ከዚህ ቀደም ካደረጋቸው ከፍተኛ ቅስቀሳዎች መረዳት ይቻላል። በዚህ ዓመት እንኳ “የአቡነ ጳውሎስ ገድል” እንዲሁም “የፓትርያርክ ጳውሎስ ቁማርና የቤተክርስቲያን ተስፋ” በሚሉ አርእስቶች “አንድ አድርገን” የተባለው የማህበሩ ድረገጽ ያወጣውን አባት አዋራጅ ጽሁፍ መጥቀስ ይቻላል።

ማህበረ ቅዱሳን ቀኑ የጨለመበት ሲመስለው ደግሞ እየተቅለሰለሰ ወደ ቅዱስነታቸው በመቅረብ የልቡን በልቡ ይዞ ለሚሠራው ስራ ቅዱስነታቸው ቀኝ እጃቸውን እንዲሰጡት ይማጸናል። ትናንት ያደረገው የዚህ አካሄድ አካል መሆኑ ታውቋል።

በዚህ ወቅት ማህበሩ ምን እያደረገ ነው? የሚለውን ለማወቅ ድረገጾቹን መጎብኘት ብቻ በቂ ነው። በዚህ ወቅት የዝቋላ ተራራ ተቃጠለ አገር ይያዝልኝ፤ ዋልድባ ተደፈረ አገር ይያዝልኝ እያለ በአሜሪካ ካሉ ስውር አመራሮች ጋር በመቀናጀት ሰፊ የፖለቲካና የንግድ ስራ እየሰራ ነው። የብፁዕ አቡነ ፋኑኤልን ትእዛዝ አልቀበል ብሎ በጥፋቱ ያገዱትን “የክብር ቄስ” የመስፍን ክህነት መገፈፉን ተከትሎ ብፁዕነታቸውን አውግዟል። በዚህ ነገሮችን ሁሉ አጡዞ ጫፍ ባደረሰበት ወቅት አመራሮቹ እየተቅለሰለሱ ወደ ቅዱስነታቸው የቀረቡት ታዲያ ከሰሞኑ አጠናክረው ከዘመቱበትና አጣብቂኝ ውስጥ ከገቡበት ፖለቲካዊ እንቅስቃሴያቸው በስልት ለማምለጥ እንደሆነ ተገምቷል።