የማኅበረ ቅዱሳን የጉዞ መርሀ ግብርና አንድምታው

ከተመሰረተ 20 ዓመት ከ7 ወር ከ23 ቀን የሆነው ማኅበረ ቅዱሳን 20ኛ ዓመቱን በእግር ጉዞ ለማክበር መዘጋጀቱን በየስፍራው በለጠፈውና በየሚዲያው በሚያስነግረው ማስታወቂያ እየገለጸ ይገኛል። መስከረም 4 ቀን 1984 ዓ.ም እንደተመሰረተ የሚነገረው ማህበረ ቅዱሳን የተመሰረተበትን ቀን ሳይጠብቅና ከቀኑ ሰባት ወራትና 23 ቀናትን አሳልፎ 20ኛ ዓመቱን የምስረታ በዓል ማክበር ለምን አስፈለገው? የሚል ጥያቄን በብዙዎች ዘንድ ፈጥሯል።

ማኅበሩ የማያውቁትንና እርሱም በስም ብቻ ካልሆነ በቀር የማያውቃቸውን የብፁዕ አቡነ ጎርጎርዮስን ፎቶ ግራፍ የማስታወቂያው ማዳመቂያ ያደረገ ሲሆን፣ ብፁዕነታቸው የማኅበሩ መሥራች አባት ተደርገው እንዲቆጠሩ በስማቸው ብዙ ሲሰራ እንደቆየ ለማወቅ ተችሏል። ብፁዕነታቸው ከዚህ ዓለም በሞት የተለዩት በ1982 ዓ.ም መጨረሻ ላይ ሲሆን፣ ማኅበሩ የተቋቋመው ደግሞ ከ2 ዓመት በኋላ በ1984 ዓ.ም ነው።

«ለሁለንተናዊ የቤተክርስቲያን ዕድገት አብረን እንስራ!» በሚል መሪ ቃል የእግር ጉዞውን ያዘጋጀው ማኅበሩ፣ መሪ ቃሉ «ለቤተክርስቲያን ዕድገት» ቢልም፣ ዕድገቱ በቤተክርስቲያን ስም ተነግዶ ለማኅበሩ እንጂ ለቤተክርቲያን አለመሆኑን የሚያውቅ ያውቀዋል። ማኅበሩ በዚህ ወቅት የእግር ጉዞውን ያዘጋጀው 20ኛ ዓመቴን ለማክበር ነው ቢልም፣ ከበስተጀርባው ብዙ ዐላማዎችን አንግቧል እየተባለ ነው። የምሥረታ ቀኑ ካለፈ ከ7 ወራት በኋላ 20ኛ ዓመቴን ላክብር ብሎ መነሳቱ በራሱ ያነጋግራል። ማህበሩ ግብር ከፋይ ያለሆነና በመንፈሳዊ ስም የሚያጭበረብር ስግብግብ ነጋዴ በመሆኑ አጋጣሚውን ለከፍተኛ ገቢ ማሰባሰቢያነት ሊጠቀምበት አቅዷልና እያንዳንዱ ተጓዥ ጉዞ ሰነድ የተባለውን በ100 ብር እንዲገዛ እያደረገ ነው። ለዚህም ከ21 በላይ የሆኑ ሰነዱ የሚሸጥባቸውን አድራሾች ያስተዋወቀ ሲሆን፣ እነዚህም የማኅበሩን የወረዳ ማእከላት፣ የግቢ ጉባኤያትንና የሰራተኛ ጉባኤያትን ሳይጨምር ነው።

የእግር ጉዞውን በተመለከተ ለሚመለከተው የቤተክህነትም ሆነ የመንግስት አካል አስቀድሞ አለማሳወቁን ምንጮቻችን ገልጸው፣ ምንአልባት ጉዞው እንዳይካሄድ ቢታገድ፣ የሰበሰበውን ገንዘብ ለማቅለጥ እንዲመቸው ይህን እንዳደረገ የሚናገሩ አሉ።

መስከረም ላይ ተመስርቶ ሳለ ሚያዝያ ላይ 20ኛ ዓመቱን ለማክበር የተነሳው ማኅበሩ፣ ይህን በአጋጣሚ እንዳላደረገውና አሁን ቤተክርስቲያኒቱ ውስጥ የሚታየውን አንዳንድ ሁኔታ ተጠቅሞ የራሱን ጥቅም ለማስከበር እንደሆነ ተገምቷል። ከግንቦቱ የሲኖዶስ ስብሰባ ጥቂት ቀናት ቀደም ብሎ የእግር ጉዞው መካሄዱ ማኅበሩ በጉዞው የሚሳተፈውን ሰው የራሱ አባል እንደሆነ አድርጎ ለማሳየት፣ ብዙ ደጋፊ ሕዝብ አለኝ ለማለትና በቅዱስ ሲኖዶስ ስብሰባ ላይ የተቻለውን ተጽእኖ ለማሳረፍ እንደሆነ እየተነገረ ነው። በተለይ በዚህ ስብሰባ እንዲታዩ በይደር በቆዩት አጀንዳዎች ላይ የእርሱን ጥቅም በሚያስከብር መልኩ እንዲወሰንለት ከዚህ ቀደም ብዙ ገንዘብ አፍስሶ አንዳንድ ብፁዓን አባቶችን እስከማሳሳት ደርሶ እንደ ነበር የሚታወስ ነው። ከዚህ በተጨማሪም በቅርቡ ከዋልድባ ገዳም ጋር በተያያዘ ማኅበሩ ያሰነሣውን አቧራ ይበልጥ ለማጫጫስና በአሜሪካ ወኪሎቹ በኩል ያስተባበረውን የተቃውሞ ሰልፍ በእግር ጉዞ ስም አገር ውስጥም በመድገም አጋጣሚውን ሊጠቀምበት እንደሚችል የብዙዎች ግምት ሆኗል።

ስለዚህ የሚመለከተው የቤተ ክህነት አካል ሁኔታውን በቅርብ እንዲከታተልና አስፈላጊውን ቁጥጥር እንዲያደርግ በዚህ አጋጣሚ ለማሳሰብ እንወዳለን።