የማኅበረ ቅዱሳን አመራሮችና አባላት ጭፍን እይታ

Click here to read in PDF

መጽሐፍ ቅዱስ ሁሉን ፈትኑ መልካሙን ያዙ ሲል መንፈሳዊ እይታችን ሚዛናዊ በሆነና እውነት ባለው ነገር ላይ እንዲመሠረት ይመክረናል (1ተሰ. 5፡20-21)። ይህን ሐዋርያዊ ቃል መመሪያው ያላደረገ ሰው ግን የሚያምነውና የሚኖረው በጭፍን ነው። በማኅበረ ቅዱሳን ዘንድ ወንጌል ስሙ ብቻ እንጂ ግብሩ ፈጽሞ የማይታወቅ ሲሆን ቤተ ክርስቲያን ማለት ደግሞ የእነርሱ ማኅበር ይመስላቸዋል። እነርሱ በጥላቻ ተሞልተው “መናፍቅ” የሚሉት ማንኛውንም የማኅበሩ አባል ያልሆነውን ሰው ነው። “እገሌ የቤተ ክርስቲያን ልጅ ነው። እንዴት መናፍቅ ትሉታላችሁ” ተብለው ሲጠየቁ “ማኅበራችን አያውቀውም ስለዚህ መናፍቅ ነው” የሚል ነው መልሳቸው።

ለእነርሱ የምንፍቅና መመዘኛ የቤተ ክርስቲያኒቱ ዶግማ አይደለም፤ የማኅበራቸው አባል መሆን አለመሆን ነው። መናፍቅ የሚለው ስም ትርጉሙ ቢገባቸው፣ በሀሳቡ መንፈስ ቅዱስ ከተስማማ ሰውዬውን ከመንግስተ ሰማያት የሚያስወጣ ቃል ነው። ስለዚህ ይህን የማለት ስልጣን ያለው አንድ የፅዋ ማህበር ሳይሆን ቤተ ክርስቲያን ናት። ቤተክርስቲያንም ሸክሙ ስለሚሰማት ዝም ብላ መናፍቅ አትልም። የነገሩን መነሻና መድረሻ መዝና፣ ባለጉዳዩን አናግራ፣ አስተምራ፣ ጥፋት ቢገኝበት ንስሀ እንዲገባ ነግራ፣ አልመለስ ካለና በሀሳቡ ከጸና ብቻ ነው መናፍቅ የምትለው። ምክንያቱም የአንድ ሰው ነፍስ ምን ያህል ዋጋ እንዳለው ጠንቅቃ ታውቃለች እና ነው። ማህበረ ቅዱሳን ግን በሆነ ባልሆነው፣ መሽቶ እስኪነጋ ሰውን መናፍቅ ለማለት ብቻ የሚደክም፣ ሰውየው ቢመለስ እንኳ መመለሱን የማይፈልግ፣ በጭፍን ጥላቻ የተሞሉና ጥላቻቸውን የሃይማኖት ካባ የሚያለብሱ ተራ አስተሳሰብ የዋጣቸው አመራሮችና እነርሱን በጭፍንንነትና በቅንንነት አምነው የሚከተሉ አባለት ያሉት ማኅበር ነው።

ማህበረ ቅዱሳኖች እገሌን መናፍቅ ነው ለማለት ምክንያት የማስፈልጋቸው መሆኑ በተደጋጋሚ ታይቷል። እገሌ እዚህ ቦታ ታይቷል፤ ይህን ቀምሷል፣ ያን ነክቷል፤ በሚሉ እርባና ቢስ ምክንያቶች ብቻ ሰውን መናፍቅ እያሉና እያሰኙ መኖር የሚያረካቸውና የእነርሱ ህልውና ሰውን ሁሉ መናፍቅ ከማለት ጋር የተያያዘ የሚመስላቸው አመራሮቹ፤ ለ20 ዓመታት ሲጋቱት የኖሩት ወግንና ልማድን፣ የፈሪሳውያን እርሾ የሆነው ግብዝነትንም በመሆኑና መንፈሳዊነትን ከቶ ስላልፈጠረባቸው፣ ለህልውናቸው መቀጠል ሲሉ ለሚፈጽሟቸው ወንጀሎች እግዚአብሔር ምን ይለኝ ይሆን? የማይሉ ተንኮልና ማስመሰል ቀለባቸው የሆነ ከንቱዎች ናቸው።

ደግነቱ እስካሁን ድረስ መንፈስ ቅዱስ ከማኅበረ ቅዱሳን ጋር አልተስማማም፤ አይስማማምም እንጂ ስንቱን የቤተክርስቲያን ልጅ የማኅበራችን አባል ለምን አልሆንክም በሚል ጥላቻ ከመንግስተ ሰማያት አስወጥተው በጣሉት ነበር።

ለዲያቆን በጋሻው ጥብቅና የመቆም ሀሳቡም ፍላጎቱም የለንም። ነገር ግን ከበጋሻውና ከዘሪሁን መናፍቁ ማነው? አልዓዛርን የፈወሰው ኢየሱስ ነው። ስለዚህ ኢየሱስ በሉ፤ ስላሴ አትበሉ። በስሙ ጥሩት የሚለውን ትክክለኛ የሆነ መጽሐፍ ቅዱሳዊና የቤተክርስቲያን ትምህርት ነው። ነገር ግን ሁልጊዜም ክፋትና ተንኮል ምቀኝነትና ቅናት ተግባሩ የሆነው ማኅበረ ቅዱሳን ግን፣ በጋሻው ስላሴን ተቃወመ በማለት ቃሉን ከአውዱ ውጭ ተርጉሞ ፊልም ቆርጦና ቀጥሎ መናፍቅ ለማለት ማንም አልቀደመውም። ዘሪሁን በጋሻውን ተቃወምኩ ብሎ እመቤታችን ስላሴን ወልዳለች በማለት በኦርቶዶክሳዊትዋ ቤተክርስቲያናችን እንደ ትልቅ ምንፍቅና የሆነ እንክርዳዱን በምእመናን ላይ ሲዘራ በቸልታ ማለፍ ጤነኛነት አይደለም። ማህበሩ ለጥቅሙ እንጂ ለቤተክርስቲያን ትምህርት እንዳልቆመም የሚያሳይ ትልቅ ማስረጃ ነው።

እውነት በልቡ አይደለም በሰፈሩ እንኳ ያለፈች ሰው ይህን ልዩነት በሚገባ ያስተውላል ብለን እናምናለን። ማህበረ ቅዱሳን እኛን ውደድ እንጂ እንደፈለክ ሁን፤ የፈለከውን ኑፋቄ ተናገር፤ ከሚል አባዜ ነፃ ሊወጣ ይገባል። ለዚህ ነው የማህበሩ አባላትና አመራሮች በጭፍን ጥላቻ የተሞሉ ለቤተክርስቲያን ሳይሆን ለራሳቸው የሚያስቡና የሚሰሩ ክፉዎች ሰራተኞች ናቸው የምንለው። (ፊልጵስዩስ 3፡2)