ገደል አፋፍ ላይ የቆመ ጎረምሳ ማኀበርን ለማዳን

          Click here to read in PDF                                                          በበከመምህረትከ

       በኢትዮጵያ ቤተክርስቲያን ውስጥ ካሉ ማህበራት መካከል አንዱ ማህበረ ቅዱሳን ነው፡፡ ማህበሩ ከተመሰረተ ሁለት አስርተ አመታትን ጨርሶ እነሆ ጉርምስናውን ተያይዞታል፡፡ ይሁንና ማህበሩ በተለይ ባለፉት ጥቂት አመታት ባልሆነ መስመር ሄዶ ሄዶ ከገደል አፋፍ ላይ ተንገራግጮ ቆሟል፡፡ ወደኋላ ተመልሶ ያለበትን ችግር በጥልቀት መርምሮ የሚሄድበት መስመር ካላስተካከለና በጀመረው መንገድ ከቀጠል ባጭር ጊዜ ውስጥ ወደገደል መግባቱ አይቀሬ ይሆናል፡፡ እንደውጭ ተመልካች ገደል ሲገባ ዝም ብሎ ከማየት እንደ አንድ የቤተክርስቲያን አባል (እና የቀድሞ የማህበሩ አባል) እንዲሁም በፊት በፊት በሰራቸው መልካም ስራዎች አንጻር ችግሮቹን ፈቶ ወደ ቀደመ ክብሩ ይመለስ ዘንድ የመፍትሄ ሃሳቤን ለማቅረብ ወደድኩ፡፡ ማህበሩ የ20 አመት ልደቱን ሲያከብር አገር ሰላም ነው ብሎ ሻማ ለኩሶ ኬኩን በመቁረስ ብቻ ሳይሆን ያለበትን አደጋ አስተውሎ ራሱን ይመረምርና መስመሩን ያስተካክል ዘንድ ይጠቅመዋል፡፡ ያን ካደረገ ደሞ ገደል ከመግባት ይተርፍና ካለበት የጉርምስና ጠባይና እድሜ ተሻግሮ ወደ ጉልምስናና እርጅና እንዲደርስ ይረዳዋል፡፡

  

       አንዳንዶች ማህበሩ በስራው የቅዱሳን ስም አርክሷል፤ ለቤተክርሰቲያኒቱ እዳ ሆኗል፤ ከጥቅሙ ይልቅ ጉዳቱ በዝቷልና መዘጋት አለበት የሚል አቋም ሲያራምዱ ይስተዋላል፡፡ እኔ ግን ምንም እንኳን በጥፋት ጎዳና ቢሄድም ተስተካክሎ ለቤተክርስቲያን እንዲያገልግል መደረግ አለበት እንጂ ፈጽሞ ሊዘጋ አይገባውም የሚል አቋም አለኝ፡፡ የማህበሩ አመራር አባላትም መንግሰትና ፓትሪያርኩ ሊዘጉን ነው ሊያጠፉን ነው የሚል ፍራቻ እንዳላቸው በውስጥ አዋቂዎች ተነግሯል፡፡ ይሁንና እንዲቀጥልም ሆነ እንዲዘጋም የሚያደርገው ራሱ ማህበሩ ነው እንጂ ፓትሪያርኩ ወይም መንግሰት አይደለም፡፡ የመቀጠል ዋስትናው ደሞ ያለበትን ችግር በመፍታት የተበላሸ አካሄዱን ማስተካከል ብቻ ነው፡፡

ከዚህ በታች የተዘረዘሩት ከቆመበት የገደል አፋፍ ሊመልሱት የሚችሉ ዋና ዋና የመፍትሄ ሃሳቦች ናቸው፡፡

 1ኛ፡ ራሱን ከስውር አመራር ነጻ ማድረግ፡- ከውስጥ አዋቂዎችና የቀድሞ አመራሮች እንደተገለጸው ማህበሩ ስውር አመራር አለው፡፡ ይህ ባስቸኳይ ሊታረም የሚገባው ነው፡፡ አንድን መንፈሳዊ ማሀበር በእግዚአብሄር መንፈስ፤ በቤተክርስቲያን ሰርአትና በአባላቱ ፍላጎት እንጂ በሌላ በስውር እጅ ሊመራ አይገባውም፡፡ ማስፈጸም ያለበትም የእግዚአብሄርን፤ የቤተክርሰቲያንና የአባላቱን አላማ እንጂ የስውር አካልን ፈጽሞ ሊሆን አይገባውም፡፡ በመሆኑም በእግዚያብሄር መንፈስ ማገልገል የሚችል ጠንካራ አመራር ባስቸኳይ በመምረጥ ራሱን ማስተዳደር መጀመር ይኖርበታል፡፡

2ኛ፡እጁን በየትኛውም ፖለቲካ ውስጥ አለማስገባት፡- በተደጋጋሚ ማህበሩ ከሚቀርብበት ክስ መሃል ከህገ ደንቡ ውጪ እጁን በፖለቲካ ማስገባቱ ነው፡፡ መንግሰት ሳይቀር ይህን በማያሻማ ሁኔታ አስቀምጦታል፡፡ አብዛኛው የማህበሩ አባላት የኢህአዴግ አባላት ናቸው የሚለው የማህበሩ አመራር መግለጫም ቢሆን ከዚህ ክስ ነጻ የሚያወጣ አይደለም፡፡ ምክንያቱም የተቃዋሚምም ሆነ የገዢ ፓርቲ አባል መሆን ያው ከፖለቲካነት የሚዘል ትርጉም የለውም፡፡  አመራሮቹም የየትኛውም ፖለቲካ ፓርቲ አባል ያለመሆናቸውን የሚያስረዳ ሰነድ ማቅረብ አለመቻላቸው አመራሩም ፖለቲካ ውስጥ እጁ የለም ለማለት የማያስደፍር ነው፡፡ በመሆኑም መንፈሳዊ ማህበር እንደመሆኑ ፈጽሞ በየትኛውም ፖለቲካ ያለመግባት የጸና አቋም ይዞ ሊተገብረው ይገባል፡፡ ከዚህ በተጨማሪም እንደፖለቲካ ተቋም የስለላ ድርጅት አቋቁሞ ሰዎችን ሊሰልልም አይገባም፡፡ ብዙዎች በፖለቲካ ውስጥ ገብቷል ብለው እንዲያምኑ ያደረጋቸው ደጀ ሰላም፤አንድ አድርገን እና ገብርሄር የተባሉት ብሎጎች የሚያስተላልፉት በሃይማኖት የተሸፈነ ፖለቲካና ሃይማኖታዊ አክራሪነት ነው፡፡ እነዚህ ብሎጎች ደሞ የማህበሩ ለመሆናቸው ብዙዎች እርግጠኞች ናቸው፡፤ ማህበሩም እስካሁን የራሱ ልሳን አለመሆናቸውን በማያሻማ ሁኔታ አልገለጸም፡፡ በመሆኑም የራሱ ብሎጎች ከሆኑ ባስቸኳይ የዚህ አይነት አካሄዱን መተው፤ የራሱ ካልሆኑ ደሞ ይህን በግልጽ በማስረጃ ማሰረዳት ብሎጎቹ የሚሄዱበትን ፖለቲካና ሃይማኖት ያጣቀሰ የተበላሸ አካሄድ መኮነን ይኖርበታል፡፡

3ኛ፡ ከራሱ ይልቅ ለቤተክርሰቲያን ቅድሚያ መስጠት፡ ማህበሩ የተቋቋመት ዋና አላማ ቤተ ክርስቲያንን ለማገለገል ነው እንጂ ራሱን ለማገልገል አይደለም፡፡ በመሆኑም ዝም ብሎ እንደስለላ ድርጅት በየቦታው መዋቅሩን ከማስፋት ይልቅ ቤተክርሰቲያንን ባሏት መዋቅር በስፋት ማገለገል አለበት፡፡ ራሱን እንደተለየ አካል ቆጥሮ ከቤተክርሰቲያን ለመጠቀም ከመሯሯጥ ይልቅ ቤተክርሰቲያኒቱን ማገልገል፤ ራሱን ከማዳን ይልቅ ቤተክርስቲያኒቱን ማዳን ቅድሚያ ሊሰጠው የሚገባ ነገር ሊሆን ይገባል፡፡

 4ኛ፡ የቤተክርሰቲያኒቱን አባቶች፤ ህግ፤ መዋቅርና አሰራር ማክበር፡ ማህበሩ ሌላ የሚከከስበት ትልቅ ቸግር የቤተክርሰትያን አባቶችን አለማክበር፤ መከፋፈልና ማጋጨት ነው፡፡ ይህ ፈጽሞ ኢ-ክርሰቲያናዊ ተግባር ብቻ ሳይሆን ሰርአት አለበኝነትም ነው፡፡ ከዚህ በተጨማሪም ለቤተክርሰቲያኒቱ ህግና መዋቅር አለመታዘዝ ሌላው የማህበሩ መገለጫ ሆኖ ቆይቷል፡፡ ለዚህም ራሱን ከሁሉም በላይ በማድረግ በቤተክርሰቲያኒቱ አመራር ራሱን በማስቀመጥ የፈለገውን ፍርድ ሲሰጥና የፈለገውን ሲሰራ መክረሙ ማሳያ ይሆናል፡፡ በመሆኑም ይህን ሰርአተ አልበኝነት በመተው አባቶቹን “ እኔ ከናንተ አልበልጥምና” ብሎ ሊያከብራቸውና ሊታዘዛቸው እንዲሁም የቤተክርስቲያቱን ህግ፤ ሰርአትና መዋቅር ያለ አንዳች ማወላወል ሊያከብር ይገባል፡፡

  

5ኛ፡ ራሱን የቅዱሳንን ስም ከሚያሰድብ ነገር ማራቅ፡ማህበሩ ስማቸውን ለማስከበር ብሎ በቅዱሳን ስም ራሱን ሰይሞ የነበረ ቢሆንም ባሁኑ ወቅት በከፍተኛ ሁኔታ እያሰደባቸው ይገኛል፡፡ የሚሰሩ አንዳንድ የክፋት ስራዎች ፈጽሞ በቅዱሳን ማህበር የሚሰሩ አይደለምና፡፡ ዘረኝነት፤ ቡድንተኝነት፤ አድመኝነት፤ ሰላይነት፤ ፖለቲከኝነት፤ስም ማጥፋት፤ ሰዎችን ከቤተክርስቲያን መግፋት፤ እንደፖለቲካኞች የውስጥ ቸግር ሲፈጠር ከውጭ የማምለጫ ፍየል መፈለግ፤ አባቶችን አለማክበር ወዘተ በየትኛውም መለኪያ መንፈሳዊ ሊሆንና የቅዱሳን ባህሪ መገለጫ ሊሆን አይችልም፡፡ ቅዱሳን እንዲከበሩበትና እንዲዘከሩበት የተቋቋመ ማህበር ተሰድቦ ቅዱሳንንም ለሰዳቢዎች አሳልፎ የሚሰጥ ሊሆን አይገባውም፡፡ በመሆኑም እንደ ቅዱሳን መንፈሳዊነቱን ጠብቆ መንቀሳቀስ ያለበለዚያም ስሙን መቀየር ግድ ይሆንበታል፡፡

 6ኛ፡ ማህበሩ ስትራተጂክ እቅድ ኖሮት ለቤተክርሰቲያን ሊሰራ ይገባል፡ አንድ ማህበር የራሱን የረዥም ግዜ ራእይ፤ ተልእኮና ግብ ተልሞ ሊንቀሳቀስ ግድ ይላል፡፡ ያለበለዚያ በአውር ድንበር ከመጓዝ ባለፈ እንድም ተጨባጭ ነገር መስራት አይቻልም፡፡ በመሆኑም ማህበሩ ለቤተክርስትያን የሚያደርገውን አሰተዋጽኦ በስትራተጂክ እቅድ ሊያስቀምጥና በዛም ራሱን ሊገመግም ይገባዋል፡፡ ይሁንና በውስጥ አዋቂዎች እንደተቀመጠው ማህበሩ ራሱ እሳት ሆኖ ተራ በሆኑ የእሳት ማጥፋት አይነት አካሄድ ላይ ራሱን ጠምዶ ነው እድሜውን ያሳለፈው፡፡

 7ኛ፡ የኔ ካልሆናችሁ ጠላቶቼ/ምንትስ ናችሁ የኔ ከሆናችሁ ግን ወዳጆቼ/ቅዱሳን ናችሁ ከሚለው የተሳሳተ አስተሳብ ነጻ መውጣት፡ ማህበሩ ብዙ ጊዜ ራሱን ብቻ እንደቤተክርሰቲያን ጠበቃ የሱ አባል ያልሆኑትን (አባቶችን ጨምሮ) በጥርጣሬ የማየት ችግር አለበት፡፡ በተለይ ሁሉም ሰዎች የኔ አባል ካልሆኑ ምንትስ ናቸው እያሉ የተለያዩ ስሞ ሰጥቶ ጠላት ከማድረግ ከተቻለ አሳምኖ አባል ማድረግ ካልሆነ ግን በጋር የሚሰሩበትን ዘዴ መቀየስ ያስፈልጋል፡፡ ወይ የኔ ሁኑ ያለበለዚያ ጠላቶቼ ናችሁ የሚለው አካሄድ ማህበሩ በራሱ ጊዜ ብዙ ጠላቶችን እንዲያፈራ አድርጎታል፡፡ ከዚህም በላይ ብዙ ምንትሶች በማህበሩ ተጠልለው ክፍ ስራ ለመስራት ዋስትና ሆኗቸዋል፡፡

8ኛ፡ በማህበሩ ያለው ግኖስቲካዊ አመለካከት መሰበር አለበት፡ ባሁኑ ወቅት ማህበሩ አገልግሎት በእውቀት ነው የሚለው አመለካከት ተንሳርፍቶበት ይገኛል፡፡ የዚህም መነሻው አባላቱ በአለማዊ ድግሪ የተንበሸበሹ በመሆናቸው ነው፡፡ በመሆኑም የሆነ አለማዊ ድግሪ ያለውና በወራት በጊቢ ጉባኤ መንፈሳዊ ኮርስ የወሰደ የማህበሩ አባል እንደሱ በአለማዊ ትምህርት ያልገፉትን አገልጋዮች በመናቅ ራሱን ሰማይ ላይ ሰቅሎ ቁጭ ይላል፡፡ ዲፕሎማና ዲግሪ የሌለው አገልጋይ ደሞ ማለት ይጀምራል፡፡ ግኖስቲክነቱ ገኖ መድረክ ላይ ይወጣል፡፡ እግዚአብሄር ጸጋ አልሰጠውምና ሰው ጀሮ ይነፍገዋል፡፡ እነዛን አልተማሩም የሚባሉትን ግን በእልልታ ይሰማል፡፡ ይሄኔ በቅናት ተነስቶ ሌላ ጦርነት ያውጃል፡፡ ከዚህ ይልቅ አገልግሎት በድግሪና በዲፕሎም ሳይሆን በእግዚአብሄር ጸጋ ነው….የቢታንያ ድንጋዮችን ያናገረ ጌታ ለሰው ልጅማ የተሻለ ሊሰጥ የታመነ ጌታ ነው፡፡

9ኛ፡ በስጋ ሳይሆን በመንፈስ ማገልገል፡ የማህበሩ ቁልፍ ችግር በመንፈስ ሳይሆን በስጋ ማገልገሉ ነው፡፡ ምናልባትም አለማዊ ድግሪ ያላቸው አባላትና አመራሮች ስላሉት ይሆናል፡፡ ባሁን ወቅት ማህበሩ ላለበት አደገኛ ሁኔታ መሰረቱም ይሄ ነው፡፡ በጸሎት፤ በትህትና፤ በፍቅር፤ በመተሳሰብ በመሳሰሉት የመንፈስ ፍሬዎች ተደግፎ ከማገልገል ይልቅ    በስለላ፤በጥላቻ፤ በትእቢት፤ ጠልፎ በመጣል በመሳሰሉት የስጋ ፍሬዎች በመነዳቱ አሁን አለበት አዘቅት ላይ ደርሶአል፡፡ በመሆኑም ባስቸኳይ ያለው በመንፈሳዊ አገልግሎት እንጂ በስጋ ስራ ላይ አለመሆኑን ተረድቶ በመንፈስ ማገልገል መጀመር የማህበሩን ህልውና የማዳን ጉዳይ ይሆናል፡፡

ምንጭ፡- ፌስ ቡክ፡- በበከምህረትከ የተጻፈ በከመምህረትከ