ሰበር ዜና፡ ብጹዕ ወቅዱስ አቡነ ጳውሎስ አረፉ

Click here to read in PDF: Abun Pawlos is passed

      (ነሐሴ፣ 10 2004 ዓ.ም. ዐውደ ምሕረት/www.awdemihret.blogspot.com// www.awdemihret.wordpress.com)አምስተኛው የኢትዮጵያ ፓትርያርክ ብጹዕ ወቅዱስ አቡነ ጳውሎስ ዛሬ ንጋት ላይ አረፉ። ቅዱስነታቸው በድንገተኛ ሕመም ባልቻ ሆስፒታል ከገቡ ከሁለት ቀን በኃላ በዛሬው ዕለት በተወለዱ በ76 ዓመታቸው አርፈዋል። ላለፉት 20 ዓመታት ቤተክርስቲያንዋን ሲመሩ የነበሩት አቡነ ጳውሎስ ከቅርብ ጊዜ ወዲህ ሕመም እየተደራረበባቸው ቢመጣም እስካለፈው ሁለት ቀን ደረስ ስራ ከመስራት አላገዳቸውም ነበር። ላለፉት ሶስት ቀናት በጠና የታመሙት አቡነ ፓውሎስ እኩለ ሌሊት ላይ ማረፋቸው ታውቋል። የቅዱስነታቸው ዕረፍት ለቤተክረስቲያኒቱ ታላቅ ሀዘን ነው። አውደ ምህረት በቅዱስነታቸው እረፍት የተሰማትን ትልቅ ሀዘን ትገልጻለች።

ዜናውን እየተከታተልን እናቀርባለን

አሁን በደረሰን ዜና መሰረት የጠቅላይ ቤተክህነቱ ስራአስኪያጅ አቡነ ፊሊጶስ መግለጫ የሰጡ ሲሆን ንግግራቸውን የጀመሩት ቤተክርስቲያኒቱ ታላቅ ሀዘን እንደወደቀባት በመግለጽ ነው። ብጹዕነታቸው ንግግራቸውን በመቀጠል “…ኃዘኑ የቤተክርስቲያን ኃዘን ነው። የሀገር ሀዘን ነው። ቅዱስነታቸው ትልቅ አባት ናቸው። የስራ ሰው ናቸው።ቀን ይሰራሉ ማታ ይሰራሉ። ሰኞ እና ማክሰኞ እንኳ ቅዳሴ ገብተው ነበር።  በሕይወቴ እንደዚህ አይነት የስራ ሰው አይቼ አላውቅም። ለኛ ሰርተው ለኛ ደክመው ያለፉ አባት ናቸው። ሞቱ ለእሳቸው ዕረፍት ነው ጉዳቱ ለእኛ ነው።…” ሲሉ ተናግረዋል።

ብጹዕነታቸው ንግግራቸውን በመቀጠል “እኒህን ታላቅ አባት እንዲሁ ዝም ብለን አንሸኛቸውም ለአለም አብያተ ክርስቲያናት አሳውቀን በተገቢው መንገድ እንሸኛቸዋለን።” ሲሉ ተናግረዋል። መግለጫውን በሰጡበት ወቅት የስብከተ ወንጌሉ አዳራሽ ሙሉ የነበረ ሲሆን ግቢው አሁንም በበርካታ ሰዎች እንደተሞላ ነው። በተለይም እሳቸው ይረዱዋቸው የነበሩት አቅመ ደካሞች ለቅሶ አብዛኛውን ሰው ያስለቀሰ ነበር።

ሲኖዶሱ አሁንም በስብሰባ ላይ ሲሆን ጳጳሳቱ ከየሀገረ ስብከቱ እየተሰባሰቡ መሆኑ ታውቋል።