የማኅበረ ቅዱሳን አመራር አባላት ማኅበሩን እየለቀቁ ነው፡፡

Click Here to Read in PDF

ከይሔ ነው እውነቱ

ሲመሰረት የነበረውን ውጫዊ አላማ አድንቀው እና ወደው ቤተክርስቲያኒቱን በተደራጀና በተጠና መንገድ ለማገልገል የፈለጉ አንዳንድ የዩኒቨርስቲ ምሩቃንና “በጎ” ዓላማውን የደገፉ ግለሰቦች ማኅበሩን ቀረብ ብለው ሲያዩት እና ውስጣዊ አላማውን ሲረዱ እንደ ድቡልቡል አለት ተገትሮ ለመጨበጥ የማይቻል መሆኑን በመረዳታቸው ተራ በተራ እየለቀቁት መሆኑ ተሰማ። እነዚሁ ከአባልነት እስከ ከፍተኛ አመራር ሰጪነት የደረሱ የስራ አመራር አባላት ለማህበሩ የወገብ ትጥቅ ሆነውለት በከፍተኛ ደረጃ ሌሎች  አባላት የሚመኩባቸው የነበሩ ቢሆንም ለራሳቸው በገባቸው የማህበሩ ከፋፋይ አጀንዳ ዕጣ ለእነርሱም ወጥቶ ሊሰሩ የፈለጉትን ሥራ በአግባቡ ለመስራት ባለመቻላቸው ምክንያት ማኅበሩን ለመልቀቅ ወስነው የመልቀቂያ ደብዳቤ አስገብተዋል።

በእግዚአብሔር ሀሳብ ቀዳሚ የሆነውን አህዛብን በአብ በወልድ በመንፈስ ቅዱስ እያጠመቃችሁ ደቀ መዛሙርት  አድርጉአቸው የሚለውን የቤተ ክርስቲያኒቱን ተልዕኮ ቸል ብሎ ወንጭፍ ወርዋሪ አገልግሎት ላይ ራሱን የጠመደው ማኅበረ ቅዱሳን ራሱን ጠልፎ የሚጥል እንቅስቃሴ ከጀመረ ሰንብቷል። ከቤተክርስቲያን የአገልግሎት ራዕይ መቀበል ሲገባቸው ያልሰከነ ስሜታቸውን አጀንዳ በማድረግ ግለሰብ ተኮር እንቅስቃሴ በማድረግ ደግመው እንኳን ሊያጣሩት የማይፈልጉትን ጥርቅምቃሞ ወሬ ማስረጃ ብለው በመያዝ እንደ አበደ ውሻ እየተክለፈለፉ ያሉት የማህበሩ ሰዎች ውድቀታቸውን በሚያፋጥን እንቅስቃሴ መጠመዳቸው እያስተዛዘበ ይገኛል። በዚህ ግለሰብ ተኮር እንቅስቃሴ ከየት እንደሚነፍስ የማይታወቅ ነፋስ አባላቱን ተረጋግተው የተሰበሰቡለትን ዓላማ ተፈጻሚ እንዳያደርጉ አጀንዳ በመስጠት ከቤተክርስቲያኒቱ አባቶችና ከፖለቲካው ጋር እያላተማቸው ነው፡፡ በዚህ ግጭት መካከል የራሳቸውን አጀንዳ የሚያስፈጽሙ ጆቢራዎች ግን በሌላው ቁስል ኑሮቸውን እያስተካከሉ አላማቸውን እያስፈጸሙ ይገኛሉ፡፡

ይህን ስውር ፖለቲካና ዘረኝነት የተላበሰ አካሄድ ያልተዋጠላቸው የተቀየጠብን እንክርዳድ ይለይ ማህበራችን ውበቱ መንፈሳዊነቱ ነው በማለታቸው ሆዳቸው አምላካቸው የሆነና የአካሄድ ብስለት የሌላቸው ባለሥውር አጀንዳዎቹ አመራሮች የተመቻቸውን ስም በመስጠት መልቀቂያ ያስገቡ አባላትን  ከማህበሩ የማይጠበቅ ጸያፍ ደብዳቤ በመጻፍ እያባረሩ ይገኛሉ፡፡

እነዚህ ሰዎች ለማኅበሩ ህልውና ከፍተኛ ዋጋ የከፈሉ እና አስከ ቅርብ ጊዜም እየከፈሉ የነበረ ሲሆን በተለይም ከቅርብ ጊዜ ወዲህ ያየኝን ያስነክሰኝ የሚል “ጸሎት” እያደረሱ ከቤታቸው የሚወጡት አመራሮች በሁሉ አቅጣጫ ከመንግስት እስከ ግለሰብ ድረስ ለማጥቃት በዘረጉት አካሄድ ማኅበሩ ከሁሉ ጋር እየተናከሰ ስላስቸገረ ምን እየሰራን ነው? የተነሳንበት አላማ ይሄ ነው ወይ? ሰው የማኅበረ ቅዱሳን አባል ሳይሆን መኖር አይችልም ወይ? ምንፍቅናና ቅድስና ማኅበረ ቅዱሳንን ከመውደድና ከመጥላት ጋር ለምን ይያያዛል? ለምን እውነተኛ አጀንዳ እውነተኛ ፍረጃ እውነተኛ አካሄድ አይኖረንም? የሚል ጥያቄዎች ከአመራር አባላቱና ከስራ አስፈጻሚ አባላቱ መካከል እየተነሳና ድምጹም ጎልቶ መሰማት በመጀመሩ በተለመደው ስም ማጥፋትና ፊት መንሳት አካሄድ የተከተለው ማኅበርን የለም አያዋጣም ብለው ፊት ለፊት የተጋፈጡት ሰዎች እየተንገዋለሉ እንዲቀሩ ተደርገዋል። ከነዚህም መካካል

1.     ቀሲስ ሰሎሞን ሙሉጌታ የትምህርት ክፍልና የዋና ማዕከል ሥራ አመራር(የማኅበሩ ቁጥር አንድ ሰባኪ ወንጌል የነበረና ከዩንቨርሲቲ ተማሪነቱ ጀምሮ ማታ ማታ ባዶ ክፍል እየፈለገ ተማሪዎችን ሰብስቦ በማስተማር የሚታወቅ። ከማኅበሩ ከወጣም በኃላ ብዙ ጊዜውን ለአገልግሎት ሰጥቶ በቦሌ መድሀኒዓለም ቤተክርስቲያን ከህጻናት እስከ አዋቂ በተለያየ መርሐ ግብር እያስተማረ ያለ። በቅርቡም ከቅድስት ሥላሴ መንፈሳዊ ኮሌጅ ትምህርቱን ጨርሶ የተመረቀ።)

2.    መንግስቱ ጎበዜ የጥናትና ምርምር ዳይሬክተር

3.    ዲ/ን በለጠ አምስት ኪሎ ሌክቸረር የአዲስ አበባ ማዕከል ዋና ጸሐፊ

4.    አስራት ከበደ የማህበሩ መጽሔትና ጋዜጣ አዘጋጅ

5.    አሉላ ጥላሁን የማህበሩ መጽሔትና ጋዜጣ አዘጋጅ(አይታክቴ በሚል ስም በወዳጆቹ መካከል የሚታወቀው አሉላ አቋምም ዝግጁነትም አለው የሚባል ሰው ነው። አዲስ ነገር ጋዜጣ በነበረበት ጊዜም ጭምር የጀመረውን ሥራ ሳይፈጽም እንቅልፍ የማይነካካው ሰው እንደሆነ ይነገርለታል። ለስነጽሁፍ ባለው ዝንባሌ ከሐመር መጽሄት ምክትል ዋና አዘጋጅነት እስከ ሕገ ወጦቹ የማኅበሩ ብሎጎች እስከ ሕጋዊዎቹ ብሎጎችና የህትመት ሚዲያ ውጤቶች ድረስ በኃላፊነትና በተቆጣጣሪነት  እና በጹሁፍ አቅራቢነት ሰርቷል።)

6.    ሂሩት የገዳማትና አብነት መምህራትን መርጃ ዳይሬክቶር

7.    መንግስቱ ገ/ዮሐንስ የልማትና ተቋማት ዳይሬክቶር

8.    ዲ/ን ዳንኤል ተስፋዬ ከሙሉጌታ ኃ/ማርያም በፊት ዋና ጸሐፊ የነበረ

9.    ዶ/ር ያየህ የጥናትና ምርምር ዳይሬክቶር (ከመንግስቱ ጎበዙ በፊት የነበረ)

10.  መድሀኒት ዘዋለ የመለከት መጽሔት ዋና አዘጋጅ

11.    ቅድስት ማሙሻ የኤፍሬም እሼቴ የብዙ ግዜ እጮኛ የነበረች እና የማህበሩ ከፍተኛ አመራር

12.    ዳንኤል ክብረት ለብዙ ዘመናት ዋና ጸሐፊ(በአንድ ወቅት ማኅበረ ቅዱሳን ማለት ዳንኤል ነው እስኪባል ድረስ ከፍተኛ ተቀባይነትና ዝና የነበረው ሰው ነው። ዳንኤል በሥራው አይለግምም። በተንኮሉም አይለግምም። ሁሌም በማግባባት ሰዎች ወደ ሀሳቡ አንዲመጡ ከማድረግ ወደ ኃላ የማይል ሰው ነው። የተቃወሙትን ሰዎች ደግሞ ጥርሱን እያሳየ ቀስ ብሎ አፍር በማስላት ታዋቂ ነው። ሰዎችን በማግባባት ጎበዝ ስለሆነም አንዱን ሲያጠቃ የሚያጠቃውን ሰው የልብ ወዳጅ ሳያስበው መሳሪያ ያደርገዋል። አርሱ ብቻ በገባው መንገድ የልብ ወዳጆቹ እርስ በራስ ተቀዋሚ ይሆናሉ። ስለዚህ ማንም ሰው ዳንኤል ነው ይህን ያደረገው ብሎ አይጠረጥረውም። ማሕበሩን ከሩቅ ሆኜ መቆጣጠር እችላለሁ ብሎ ያመነው ዳንኤል ከማኅበሩ ራቅ ብሎ የግል ሥራውን እየሰራ ማኅበሩን በራሱ አቅጣጫ ማስኬዱ ተሳክቶለት የነበረ ሲሆን ዋና ጸሐፊነቱን ሙሉጌታ ከያዘው በኃላ ግን በማኅበሩ ውስጥ የነበረው የቀድሞ ግርማው ተገፏል። ባለፈው አመት ከሙሉጌታ ጋር የነበረው ቁርሾ ከፍተኛ ደረጃ ላይ መድረሱ ታይቷል። እርቅ ከተባለም በኋላ እርቁ ለይምሰል ስለነበር ቁርሾው እንደቀጠለ ሲሆን፣ ሙሉጌታም ዳንኤል ቀርታው የነበረውን ብጣቂ ተቀባይነት ተሟጣ ከማኅበሩ እንድትጠፋ አጥጋቢ ሥራ ሠርቷል። አሁን ከአዲስ አበባው አመራር ጋር ሙሉ በሙሉ ሥራ መሰራት እንደማይችል ተረድቶ ፊቱን ወደ አሜሪካ አዙሯል።)

እነዚህ ከላይ የዘረዘርናቸው የማኅበሩ የቀድሞ አመራር አባላት ማኅበሩን ሲያግዙና መንፈሳዊ አገልግሎትን ሲያጠናክሩ ከቆዩ በኋላ ማህበሩ ሃይማኖታዊ ፋይዳውን እያጣ ፖለቲካዊ አጀንዳው እየጎለበተ በግልጥ ሥራ ሲጀምር ከኑግ የተገኘ ሰሊጥ ከመሆን ብለው ለቀው ወጥተዋል፡፡ እነኚህ የቀድሞ አመራር አባላት አሁን ያሉትን አመራሮች ቢመክሯቸውና ቢያስመክሯቸው ከዓላማቸው ፈቀቅ ማለት አለመፈለጋቸውን ተረድተውና ኦርቶ-ሰለፊያ አራማጆችን ትተው የእግራቸውን ትቢያ አራግፈው ከማኅበሩ ወጥተዋል፡፡ ከቅርብ ጊዜ ወዲህም በአሜሪካው እና በአዲስ አበባው አመራር መካከል ግልጽ ልዩነት እየታየ የመጣ ሲሆን እሱን የሚያክም ጠፍቶ ልዩነቱ ከቀን ወደ ቀን እየሰፋ ይገኛል።

ማኅበሩ ያዳቆነ ሰይጣን ሳያቀስ አይቀርም እንደሚባለው ያለበትን ስህተት አርሞ የተሰጠውን እድል ተጠቅሞ አቅጣጫውን አስተካክሎ ለመጓዝ ፈቃደኛ አለመሆኑ ብዙዎቹን አስገርሟል፡፡ የፖለቲካውን ካባውን አውልቆ በእግዚአብሔር የተመሰረተችን ሐዋርያዊትና ጥንታዊት ቤተክርስቲያንን በቅንነት አባቶች ባስቀመጡለት መመሪያ መሠረት መመራት ሲገባው ፈቃደኛ አለመሆኑ ከአፈርኩኝ አይመልሰኝ አካሄድ መሆኑ እሙን ነው፡፡ ሁሉን በእነርሱ ቅኝት መቃኘትና የአባልነት መታወቂያ የሌለውን ኢ-ኦርቶዶክሳዊ እያሉ የራስን ጡንቻ ማፈርጠም ውሎ ሲያድር እንደጎልያድ የሀፍረት ሸማ ለመከናነብ መሆኑ አይቀሬ ነው፡፡ አሁን አሁን አባላቱ “የማኅበረ ቅዱሳን አባል ያልሆነ ሰው ሁሉ ተሃድሶ ነው ጸረ ቤተክርስቲያን ነው።” በማለት በድፍረት መናገር በመጀመራቸው አላማቸው ምን እንደሆነ በግልጽ እያሳየ መጥቷል። የማኅበሩ አካሄድም በውሃ አልረሰርስ ብሎ የደነደነ ልብ በመዶሻ መድቀቁ አይቀሬ መሆኑን ያመላከተ ነው።

የለቀቁት አመራር አባላት ችግሩን በውስጥ ሆነው ለማስተካከል ቢሞክሩም በአንዳንድ ከእኛ በላይ ለአሳር ባይ ነውጠኛ አመራር አካላት ከፍተኛ ጫና ስለደረሰባቸው ውጥናቸውን ተፈጻሚ መሆን አልቻለም፡፡ ይሁን እንጂ በውስጥ ካሉ የማህበሩን አካሄድ ከሚቃወሙ የሀሳብ ተጋሪዎቻቸው ጋር በመሆን ማኅበሩ ስውር ካባውን እንዲያወልቅ በቅንጅት በመታገል ላይ ይገኛሉ፡፡

በመሆኑም በማወቅም ሆነ ባለማወቅ በጭፍን ማኅበሩን እየደገፍን ያለን አባላትና ግለሰቦች  እየተቃወምነው ያለነው በሐዋርያትና በነቢያት ደም የተመሠረተውን እውነታ መሆኑን አጢነን ፍጻሜው እንዳይጠፋብን ዛሬ ተብሎ በተጠራበት እለት ነቅተን የአንዲት ቤተክርስቲያን ማኅበር አባላትን እንድንሆን ጥሪያችንን እናስተላልፋለን፡፡ ሐዋርያት ያቆዩሉን አንዲት ማኅበር ይህቺውም ሁላችንም በውስጧ ልንጠለልባት የሚገባ ሁሉን አቀፍ የሆነች የግለሰብን አላማ ሳይሆን የመሰረታትን የጌታችንን የኢየሱስ ክርስቶስን አላማ የምታራምድ በሁሉ ስለሁሉ የሆነች የሐዋርያት ማኅበር ነች፡፡  

ማኅበሩ በገጠር ያሉ የተዘጉ አብያተ ክርስቲያናትን አስከፈረታለሁ፣ የአብነት ት/ቤቶችን እረዳለሁ፣ ገዳማትን እደጉማለሁ ቢልም የባለፉት ሀያ አመታት ነባራዊ ውጤት ግን የምዕመናን ቁጥር መቀነስ፣ የመቻቻል መንፈስ መበረዝ፣ ጎጠኝነት እና ዘረኝነት መንሰራፋት፣ እድሜ ጠገብ ቅርሶች መዘረፍ፣ የአብነት ተማሪዎች መበተን እንደሆነ ሁላችንም የምናውቀው ሀቅ ነው፡፡

መቼም በተጠና ሁኔታ የቤተክርስቲያኑቱን ችግር እቀርፋለሁ ብሎ ፕሮጀክት ቀርጾ ገንዘብ በመሰብሰብ ወደር ያልተገኘለት ማኅበር የሰበሰበው ገንዘብ ለታቀደለት አላማ አለማዋሉን የሚያረጋግጥልን እውነታም የማኅበሩ አካሔድ ችግር ያለበት መሆኑን የሚያሳይ ነው፡፡ አንዳንድ የማኅበሩ አመራር አባላት ምንም እለታዊ ሆነ ወርሀዊ የገንዘብ ምንጭ ሳይኖራቸው በአዲስ አበባ ከፍተኛ ቦታዎች ባለሁለት ፎቅ መኖሪያ ቤት ማሰራታቸው የገንዘብ መና ከሰማይ ወርዶላቸውም አይመስለንም፡፡

ስለሆነም ምዕመናን በጎነቱ ብቻ እየታያችሁ የምትለግሱት ገንዘብ ለታቀደለት ዓላማ አለመዋሉን እንድታጤኑ እያሳሰብን በሃይማኖት ስም የሚፈጸመውን የተደራጀ ዘረፋ ሁላችንም ባለንበት አጥቢያ ልንቃወመው ልናስቆመው ስለሚገባ ይህንኑ ተግባራዊ እንድናደርግ በቤተክርስቲያን ስም ጥሪያችንን እናስተላልፋለን፡፡