የ"ማኅበረ ቅዱሳን" የሰሞኑ የገጽታ ማሻሻያ (Facelift) ሙከራ

getseta mukera: Click her to read in PDF

ምንጭ፡-ደጀ ሰላም(dejeselaam.blogspot.com)

ሰሞኑን (ሰኔ 25 ቀን 2004 ዓ.ም) የኢትዮጵያ ቴሌቪዥን "አንድ ሀገር አንድ ሃይማኖት" በሚል ርዕስ ዶኩሜንታሪ ፊልም አቅርቦ ነበር፡፡ በዚህ ፊልም ኢቴቪ ሊያስጨብጥ የፈለገው እውነት በኢትዮጵያ ውስጥ የሃይማኖቶች መቻቻል ጥንት የነበረና ያለ፣ ለወደፊቱም መቀጠል ያለበት መሆኑን ነው፡፡ በዚሁ ዘገባው አንዳንድ ሃይማኖቶችንና ተቋማቸውን የማይወክሉ የጽንፈኝነት አዝማሚያዎች በየጊዜው መታየታቸውን በማሳየት አፍራሽ ጎናቸውን ለማንጸባረቅ ሞክሯል፡፡ መልዕክቱ ከሞላ ጎደል የተዋጣለትና ጥሩ አቀራረብ ነበረው፡፡

አስተያየታችን ያነጣጠረው ስለዘገባው ይዘትና በሃይማኖቶች መካከል ስላለው መቻቻልና የጽንፈኝነት አዝማሚያዎች ለመተቸት ሳይሆን፣ አንዳንድ በየመንግሥት ተቋሙ የሚገኙ የ"ማኅበረ ቅዱሳን" አባላት ባገኙት አጋጣሚ ሁሉ ለማኅበራቸው ገጽታ ግንባታና ማኅበሩ ለሚያደርሰው የጥቃት ሽፋን ለመስጠት ምን ያል እንደሚፍጨረጨሩ ለማሳየት ነው፡፡

"ማኅበሩ" ከሚገመተው በላይ ሥር ሰዶ ምን ያህል የመንግሥት መዋቅርን እንደተቆጣጠረ ማወቅ የሚቻለው ችግር ሲያጋጥም ብቻ ነው፡፡ በተለይም በኢትዮጵያ ኦርቶዶክስ ተዋህዶ ቤተክርስቲያን ሥር ባሉ ገዳማትና አድባራት ውስጥ ዘወትር ግጭት በመከሰት ላይ ያለ ሲሆን፣ በዚህ ችግር የሚጎዱ ምዕመናንና ካህናት ቤተክህነት ፍትሕ መስጠት ስላልቻለች ወደ መንግሥት ተቋማት ለአቤቱታ መሄዳቸው የማይቀር ነው፡፡ በዚህ ሁኔታ የቀረቡ አቤቱታዎች ተዳፍነው፣ ተቀልብሰው ወይም በተበዳይ ላይ ፍርደ ገምድል ፍርድ ተሰጥቶ ማየት የተለመደ ሆኗል፡፡

ዛሬ በሠለጠነው ዓለምና ዘመን፣ መንግሥት ለሕዝብ ፍትሕና እኩልነትን አሰፍናለሁ ብሎ በሚታገልበት በአሁኑ ወቅት፣ በግብር ከፋዩ ገንዘብ ደመወዝ እየተከፈላቸው በየመንግሥት መሥሪያ ቤቱ ተቀጥረው የተሰገሰጉ የ"ማኅበሩ" አባላት ለማኅበራቸው ኅልውና ሲሉ የቤተክርስቲያንን ጉዳይ እንዳሻቸው ሲቆለሙሙ ኅሊና የሚባል ነገር የተፈጠረባቸው አይመስልም፡፡ ይህንን የሚረዳው የደረሰበት ብቻ ነው፡፡

ከ"ማኅበሩ" ጋር በሚደረግ ግጭት የሚቆስሉ፣ የሚደሙ፣ የሚሻሩ፣ የሚባረሩ፣ የሚታገዱ ምዕመናንና ካህናት ጉዳያቸውን ለፖሊስ ሲያቀርቡ ተጣርቶ ለፍትሕና ለፍርድ ቤት አይቀርብላቸውም፤ ዐቃቤ ሕግ የተልፈሰፈሰና በሕግ አንቀፅ ያልተደገፈ ሃሳብ ይዞ ይቀርብና ሆን ብሎ ውድቅ እንዲሆን ያደርጋል፡፡ ይግባኝ ሲጠየቅ የይግባኝ ሰሚ አካላት በር አስቀድሞ እንዲዘጋ ይደረጋል፡፡ መዝገብ ቤቶች ፋይሉን በመቅበር ወይም በዳተኝነት ጉዳዩን እንዲያጓትቱት ይደረጋል፡፡ እንዲህ እንዲህ እያለ እስከ ሰበር ሰሚ ችሎት ያለው ሰንሰለት ተጠፍንጎ ይያዛል፡፡

ይህ ብቻም አይደለም በየነፃ ፕሬሱ የተሰገሰጉ አባላትም በብፁዕ ወቅዱስ ፓትርያርክ አቡነ ጳውሎስና የማኅበሩን አካሄድ በማይደግፉ ሊቃነጳጳሳት፣ ሊቃውንት፣ ካህናት፣ መምህራንና ምዕመናን ላይ የስድብና የማንቋሸሽ ዘመቻ ይከፍታሉ፡፡ ከነፃ ፕሬሶቹ እንደ ዕንቁ፣ ሎሚ፣ ቆንጆ፣ ማራኪና የመሳሰሉት መጽሔቶች በአመዛኙ በወሲብ ላይ የሚያተኩሩ መጽሔቶች ሲሆኑ ከቤተክርስቲያን ሕይወት ጋር የሚያያይዛቸው ጉዳይ የለም፡፡ ይሁን እንጂ እነዚህ መጽሔቶች ሆን ብለው በከፈቱት ዘመቻ ብፁዓን አባቶች፣ሊቃውንተ ቤተክርስቲያን እና ካህናት እንዲሁም ምዕመናን ተሰድበዋል፤ እየተሰደቡም ነው፡፡ ይህ በጠራራ ፀሐይ በገሃድ ተፈጽሞ ያየነው ነው፡፡

ነፃ ፕሬሶች ለ"ማኅበረ ቅዱሳን" የሚጫወቱት ሚና በሁለት መንገድ ይገለጻል፡፡ ይኸውም፣ ፕሬሶቹ ለሚያወጧቸው ጽሑፎች ለዐምዶቻቸው ደጎስ ያለ ክፍያን ይቀበላሉ፡፡ ወይም በሌላ መልኩ "ማኅበሩ" በስውር ያቋቋሟቸው ፕሬሶችም አሉ፡፡ ከዚህ በተጨማሪም አፍቃሬ ማቅ የሆኑ የፕሬስ አዘጋጆችም የበኩላቸውን ለመወርወር ወደ ኋላ አላሉም (አዲስ አድማስ ጋዜጣን ለምሳሌ መጥቀስ ይቻላል)፡፡ ከዚህ ሁሉ በላይ እንደ ዕንባ ጠባቂ ኮሚሽንና ደህንነት ባሉ መሥሪያ ቤቶችም የተሰገሰጉ አፍቃሬ ማቅ ግለሰቦች የተሰጣቸውን ሥልጣን እንዴት አንሻፈው እንደተጠቀሙበት ማስተዋል ይቻላል፡፡ ይህንን እውነት የሚጠራጠር ቢኖር እስከ ዛሬ በፖሊስ፣ በፍርድ ቤትና በፕሬስ የተያዙ ጉዳዮችን ውጤት ማጥናት በቂው ነው፡፡

ወደ ጽሑፋችን መነሻ ስንመለስ፣ የሰሞኑ የኢቴቪ ዘገባም የሚያሳየን ሐቅ ከላይ የገለጽነውን ነው፡፡ በኢትዮጵያ ቴሌቪዥን የኢትዮጵያ ኦርቶዶክስ ተዋህዶ ቤተክርስቲያንን አስመልክተው የሚሰጡ ቃለ መጠይቆችና መግለጫዎች ሆን ተብሎ በ"ማኅበረ ቅዱሳን" አባላትና አመራሮች መሆኑ የ"ማኅበረ ቅዱሳን" ስውር እንቅስቃሴ አንዱ አካል ተደርጎ ሊቆጠር ይችላል፡፡ እንደ ሌሎቹ የመንግሥት ተቋማት ሁሉ የ"ማኅበሩ አባላት" በኢቴቪ ተሰግስገው ለ"ማኅበረ ቅዱሳን መልካም ገጽታ ግንባታ እየሠሩ መሆኑ መጠራጠር ይቻላል፡፡ ዳንኤል ክብረት፣ ዘሪሁን ሙላቱ የቀረቡባቸው ፕሮግራሞችን እዚህ ላይ ያስታውሷል፡፡

ሰሞኑን "አንድ ሀገር አንድ ሃይማኖት" በሚል ርዕስ በተሠራጨው ዘገባም የ"ማኅበረ ቅዱሳን" ቀንደኛ መሪ የሆነው ዓባይነህ ካሤ፣ ብርሃን አድማስ እና የማኅበሩ ደጋፊ የሆኑት ዶ/ር አባ ኃ/ማርያም ስለ ሃይማኖቶች መቻቻል አስተያየት ሲሰጡ ተመልክተናል፡፡ የአባ ኃ/ማርያም መቅረብ ካላቸው የሥራ ኃላፊነት ጋር ተያይዞ ነው የሚል ሰበብ ሊሰጥ ቢችልም፣ ዓባይነህና ብርሃን ከሌሎች የቤተክርስቲያኒቱ ሊቃውንት ለይቶ ሊያስቀርባቸው የሚችል ክራይቴሪያ የለም፡፡

ሁኔታውን ስናየው ኢቴቪ ውስጥ ያሉ አፍቃሬ "ማኅበረ ቅዱሳን" ሠራተኞች በአሁኑ ወቅት በ"ማኅበሩ" ላይ እየደረሰ ያለውን ዝቅጠትና መፍረክረክ ለመታደግ በያዙት አጋጣሚ የገጽታ ማሻሻያ (Facelift) ሥራ ለመሥራት የተቻላቸውን በማድረግ ላይ መሆናቸውን ነው፡፡ ከዚህ ውጪ ግን "ማኅበረ ቅዱሳን" ስለ ሃይማኖቶች መቻቻል ሊሰብክና ሊያስተምር የሚችልበት ሞራልም ሆነ ብቃቱ የለውም፤ በኢትዮጵያ ኦርቶዶክስ ተዋህዶ ቤተክርስቲያን ውስጥ ያለው የሠላም ዕጦትና ግጭት መባባስ የማን ሥራ ሆነና ነው?