የጠቅላይ ሚኒስትሩ ንግግርና የአንድ አድርገን ዘገባዎች

Click here to read in PDF

አንድ አድርገን የተባለው የማኅበረ ቅድሳን ብሎግ በማኅበሩ “ግልገል ካድሬዎች” የሚዘጋጅ  ብሎግ ነው። ማኅበርዋ በተለመደው እናንተ ባትኖሩ ቤተክርስቲያን ትጠፋለች የሚለው አታላይና ስሜት ቀስቃሽ “ወንጌሏ” ቀልባቸውን ሰልባ ለሥራ ያነሳሳቻቸው ሕጻናተ አእምሮ አባላትዋ የማኅበረ ቅዱሳን ስውሩም ግልጹም አመራሮች የሚያዙባትና እንቅስቃሴዋን በንቃት እየተከታተሉ ከማኅበሩ የመረጃ ክፍል የሚገኙ መረጃዎችን እንደ ወረደ በግልብ ስሜት ባልታረመ ብዕር ተጽፈው የሚቀርቡባት ስድ ብሎግ ስትሆን የአጻጻፍ ስልትዋና የቋንቋ አጠቃቀምዋ ከማህበሩ ሌሎች ብሎጎች ለየት ያለ ነው።

ጸሀፊዎቹ “ሕጻናት” ስለሆኑ በአፃፃፍ ስልታቸው በማስመሰል እንኳ ሊደብቁት የሚገባቸውን ከማኅበሩ ጋር ያለቸውን ግንኙነት ለመደበቅ አልተቻላቸውም። ሕጻን መች ይደብቃል። ለማህበራቸው ማኅበረ ቅዱሳን ያላቸው አመለካካት ከጭፍን ፍቅር የመነጨና በተለይ ማኅበሩ የተወቀሰ ዕለት እሳት እንደበዛበት ሽሮ በቶሎ የሚገነፍል ነው። 

ማኅበረ ቅዱሳን ከመንግስት ጋር ያለውን የአቋም ልዩነት እንደነ ደጀ ሰላምና ገብርሄር አጠይሞ ሣይሆን በግልጽ አቋሙን የሚያሳውቅበት አንድ አድርገን፣ በውስጣቸው ያለውን ፓለቲካዊ ማንነት በግልፅ እንዲታይ ጥረት የሚያደርጉበት አንድ አርገን፣ ከዚህ ማንነታቸው በመነሳትም የጠቅላይ ሚኒስትሩን ንግግር ሕፃን በሆነው አእምሮአቸው ለመውቀስ ሞክረዋል ሲጀምሩም እንዲህ ነበር ያሉት። 

“ክቡር ጠቅላይ ሚኒስቴር መለስ ዜናዊ ለህዝብ ተወካዮች ምክር ቤት በምክር ቤቱ አባላት በተነሱላቸው ጥያቄዎች መልስ ሰጥተው ነበር ፤ ስለ ሀይማኖት አክራሪነት ላይ በተነሳው ጥያቄ ላይ በተነሳ ጥያቄ ላይ ውሀቢዝምን ካስረዱ በኋላ አንዳንድ የዚህ አይዲዎሎጂ ተከታይ የሆኑ ሰዎችን ‹‹የማህበረ ቅዱሳን ተቃራኒ›› በማለት መስለዋቸዋል ፤ ይህ ምን ማለት ነው? ክቡር ጠቅላይ ሚኒስትር የተረዱት ማህበረ ቅዱሳን የሀይማኖት አክራሪነት የሚያራምድ ማህበር አድርገው ነው የሚያስቡት ፤ ሰው ሀይማኖቱን ሲጠብቅ እንዴት አክራሪ ይባላል? ፤ ከአባቶች የተረከቡትን እምነታቸውን ለቀጣይ ትውልድ ለማስተላለፍ ስራ ቢሰሩ እንዴት የሀይማኖት አክራሪዎች ሊባሉ ይችላሉ ? ፤ ጠቅላይ ሚኒስትራችን የእውቀት ማነስ ከሌለብዎ በስተቀር ይህን ማለት ባልቻሉ ነበር ፤ እኔ በበኩሌ ወሀቢዝም የሚለውን አይዲዎሎጂ በመሰረቱ የገባዎት ራሱ አይመስለኝም ፤ አለማወቅ ሀጥያት አይደለም ነገር ግን አለማወቅን እንደ እውቀት ቆጥሮ ለኢትዮጵያ ህዝብ በምክር ቤቱ ተገቢ ያልሆነ አስተያየት መስጠት ተገቢ አይደለም ፤”

በመጀመሪያ ደረጃ ጠቅላይ ሚኒስትሩ ያስረዱት ስለወሀቢዝም ሳይሆን ስለሠለፊያ ነው። የሠለፊያ አባላት በቅርብ እንኳ በግብጽ ምርጫ እንዳይወዳደሩ ታግደዋል። ቀጥተኛ አላማቸው በከፍተኛ የአክራሪነት ስሜት ተነሳስተው ሙስሊም ባልሆነ ሌላ ህዝብ ላይና በጠቅላላው በሙስሊሙም ማኅበረሰብ ላይ አምላክህን የምታገኘው እኛ ባልንህ መሰረት ነው። ከዚያ ውጭ ሌላው መንገድ ወደ ሞት ስለሚያደርስ እኛ ቀድመን እናስወገድህ የሚል አይነት ነው። ከዚህ አንፃር እስኪ ማህበረ ቅዱሳንን እንመዝነው።

ማኅበረ ቅዱሳን በጎንደር በደብረማርቆስና በደብረ ብርሃን በፕሮቴስታንቶች ላይ፣ በሐረር፣ በመቀሌ፣ በአዲስ አበባ፣ በድሬዳዋ፣ በጎንደር በአዋሳና በሌሎችም ከተሞች “ተሀድሶ” ብሎ በጠመዳቸው የቤተክርስቲያን ልጆች ላይ ያደረሰውን የድብደባና የሕይወት ማጥፋት ወንጀሎች ለማስተባባል የመጣለትን የሚናገረውና ማመዛዘን የማይችለው ሕጻነ አእምሮው አንድ አድርገን አቅም ያለው አይመስለንም። ስለደብረ ብርሀኑ ዘግናኝ ወንጀል በተለይ ነጭ ለባሹ ማንያዘዋል በግልጽና በጀብደኝነት ስሜት ምን እንዳደረገ እዚያው ቢሮዋችሁ ሊነግራችሁ ይችላል። ጥያቄውን ከፈለጋችሁ ሥላሴ ኮሌጅ እንዴት ገባህ? ብላችሁ መጀመር ትችላላችሁ።

ጠቅላይ ሚኒስትሩ ማህበረ ቅዱሳንን አክራሪ ያሉት አንድ አድርገን እንዳለው ሃይማኖቱን ስለጠበቀ አይደለም። በሀይማኖትና በሃይማኖተኛነት ስም ሌሎችን ስለሚገድል ስለሚያሳድድና በግልጽ ኢትዮጵያን በመሰለ ግማሽ የሚሆነው ህዝብዋ ኦርቶዶክሳዊ ባልሆነባት አገር ስለመንግስታዊ ሀይማኖት አስፈላጊነት አጥብቆ ስለሚሰብክና ለዚህም እንደሚታገል ስለሚገልጽ ነው። ሀይማኖት ጠባቂነት መጽሐፍ ቅዱስ እንደሚለው በማስተማርና መኖር ነው እንጂ ሰይፍ መዞና ድንጋይ ጨብጦ “ጉዳዩ የክር ጉዳይ ነው ለሃይማኖቴ እገላለሁ” ማለት አይደለም። ይህ አክራሪነት ነው። ማኅበረ ቅዱሳን “የጥምቀት ተመላሽ” የሚላቸውን ወጣቶች ያደራጃቸው ስለሃይማኖት  እንዲያሳድዱ፣ እንዲደበድቡና እንዲገድሉ እንጂ ከሱስ ተላቀው ህብረተሰቡን ከማወክ ነፃ ወጥተው እንደ መጽሀፍ ቅዱስ ትምህርት እንዲኖሩ ለማድረግ አይደለም። ለነገሩ ከጥምቀት ሲመለሱ ሰክረውና “ጨርቅ ሆነው” ነው። ብዙ ወጣቶችን በከተራ እና በጥምቀት ዕለት እንዲህ ሆነው ማየት ተለመደ ነው። ይህም የማቅ ውጤት ነው። እርሱ የመለመላቸው ለአሸባሪ ተግባሩ እንጂ የእነርሱ ሕይወት በቃለ ወንጌል ተለውጦ ለራሳቸው መዳን እንዲሆንላቸው፣ ለቤተ ክርስቲያናቸውም ተስፋ እንዲሆኑ አይደለም። ስለዚህ እንደተሰበከላቸው አሸባሪነታቸውን በተክለ ሐይማኖት፣ በዑራኤል፣ በእግዚአብሄር አብና በሚካኤል በተግባር አስመስክረዋል።

ቢያንስ ዑራኤልና ተክለ ሃይማኖት አካባቢ ያሉ የቤተክርስቲያን ልጆችን ለመደብደብ የሚሯሯጡት ልጆች ምንም አይነት መንፈሳዊነት የሌላቸው እና አሁንም ከሱስና ከነውር ስራዎች ያልተላቀቁ መሆናቸውን እናውቃለን። ማኅበረ ቅዱሳንም የሚፈልገው ሕይወታቸውን ሳይሆን ጉልበታቸውን ስለሆነ ልጆቹን እያስተማራቸው ያለው ቤተክርስቲያንን በጉልበታቸው እንዲጠብቁ እንጂ ሕይወታቸውን ለክርስቶስ እንዲሰጡ ስላልሆነ በልጆቹ ህይወት ምንም መንፈሳዊ ለውጥ ማየት አልተቻለም። ልጆቹም ሰው በደበደቡ ቁጥር ቤተክርስቲያንን ያገለገሉ እየመሰላቸው እየተደባደቡ ይኖራሉ። አንድ አድርገን ይህ ከቶ ምን ይሆን? የእናንተ አእምሮ እንደሚተረጉመው ከአባቶች የተቀበሉትን ሃይማኖት ለልጆች ማውረስ ትሉ ይሆናል እኮ?

ጠቅላይ ሚኒስትሩን የእውቀት ማነስ አለብዎት ሲል በድፍረት የተሳደበው አንድ አድርገን እውቀት እንዴት እንዳነሳቸው ያስረዳን ከእርስዎ በላይ አውቃለሁ በማለት ነው። ጉድጓድ ውስጥ ያለች እንቁራሪት የሰማዩ ስፋት በጉድጓዱ አፍ ልክ ይመስላታል!! አሉ። ይደንቃል! ምን እየፃፋችሁ እንደሆነ እንኳ ያልገባችሁ ሰዎች ጠቅላይ ሚኒስትሩን በእውቀት ማነስ መተቸታችሁ ያስገርማል። ለእናንተ ዕውቀት ማለት ያችው ማህበራችሁ በመቁኑን እየሰፈረች የምትሰጣችሁ “መረጃ” ነች። ለእናንተ እውነት ማለት ማህበራችሁ የሚያደርገውና እንደ በጎ ምግባር የሚያወራው ክፉ ሥራው ብቻ ነው። ዕውቀትን በተመለከተ እንኳን በእናንተ በተረት አባቶቻችሁም ጠቅላይ ሚኒስትሩ በዕውቀት አይታሙም። 

“ማህበሩን ለማያውቀው ሰው እንዲህ ነው ብሎ ለንግግር ማጣፈጫዎ መጠቀምዎ ተገቢ አይደለም ፤ ከበታችዎ ያሉት ሰዎች እውነቱን ሳይሆን መስማት የሚፈልጉትን ነገር ነው የሚግርዎት ፤ ከወራት በፊት ሳያስቡ የሚናገሩት አቦይ ስብሀት ‹‹ማህበረ ቅዱሳን የቤተክህነት እዳ ነው ›› በማለት ከአንድ የሀገር ሽማግሌ ሊጠበቅ የማይችል ንግግር በአደባባይ ተናገሩ ፤ እኔ በበኩሌ እርጅና ሊሆን ይችላል በማለት አልፌዋለሁ ፤ ሰው ሲያረጅ ወደ ህጻንነት ይመለሳል ይባላል ፤ ይህ ነገር እውነት መሆኑን የዛኔ ነው ያየሁት ? በዚህ አጋጣሚ ጭንቅላት ያለው ሁሉ አያስብም የሚል ጥቅስ በልጅነቴ አንብቤ ነበር  ፤ ለካንስ እውነት መሆኑ የገባኝ ዘንድሮ ነው ፤ ያኛው የትግል አጋርዎ በቅርቡ በውጭ ሚዲያ ሀገራችንን የማይመጥን አሳፋሪ ቃለ መጠይቅ ያደረገው አቶ ታምራት ላይኔ ፓትርያርክ ሸኝቶ ፓትርያርክ ሲያመጣልን ፤ አቦይ ስብሀት ደግሞ መደራጀቱ ያላማራቸው ማህበረ ቅዱሳን ላይ የቃላት ጦርነት ይከፍቱ ጀመር ፤ ቤተክርስትኒቷ ጌታ በወንጌል ‹‹ አይችሉሽም››ተብላለች ፡፡”

ጠቅላይ ሚኒስትሩ ስለማህበሩ የተናገሩት ለንግግር ማጣፈጫነት አይደለም። የጽዋ ማህበራችሁ የመንግስትም የቤተክርስቲያንም ሸክምና ችግር ስለሆነ ነው እንጂ። ደግሞስ የትኛው ጨውነታቸሁ ነው ለንግግር ማጣፈጫነት እንድታገለግሉ የሚያደርጋችሁ? እናንተ እኮ ጣዕም የለሽ አልጫዎች ናችሁ። ከበታች ያሉ ሰዎች ለጠቅላይ ሚኒስትሩ እውነቱን ቢነግሯቸው ኖሮማ እስካሁንም ማህበሩ በትክክለኛ ቦታው ላይ ተቀምጦ በተገኘ ነበር። ይህንንም እሳቸው የተረዱት አልፈው በሚወጡ ነገሮች ነው። የእናንተ የአሸበሪነት ልክ እኮ ከደርብ በላይ ነው። ሞልቶ ከፈሰሰው ያወቁትን እውነት ነገሩን እንጂ እናንተማ እንድ ቀንም እንኳን እንድትኖሩ የማያሰነብት ግፍና የህዝብ ደም ያለባችሁ ናችሁ።

አቦይ ስብሀት “ማህበረ ቅዱሳን የቤተከህነት ዕዳ ነው” ብለው መናገራቸውን የማንነትህ መገለጫ የሆኑ ተራና ተልካሻ ቃላትን ተጠቅመህ ወቅሰሃቸዋል። እግረ መንገድህንም የስድብ ሊቅነትህን በጥቅስ ለማስደገፍ ሞክረሀል። እኛ በበኩላችን ከአቦይ ስብሀት ከሰማናቸው ቁም ነገሮች አንዱ እና ዋነኛው ይህ ንግግራቸው ነው እንላለን። ማቅን ለመግለጥ ጥሩ ቃል ቸግሮን ነበር አሳቸውም “የቤተክህነት ዕዳ ነው” ብለው በዐጭር ቃል በሙላት ገልጸውታል። በዚህ እናመሰግናቸዋለን። ማቅ የቤተክህነት ዕዳ ለመሆኑ የሲኖዶስ ስብሰባ ሲደርስ የስብሰባውን አቅጣጫ ለማስቀየርና እርሱ በሚፈለግው መንገድ ለመንዳት አመራሮቹ የሚያደርጉትን ዕንቅልፍ አልባ ሩጫ በግልጥ ያስረዳል። 

አቦይ ስብሀትን ለመንካት ማህበረ ቅዱሳን “መደራጀቱ ያላማራቸው ማህበረ ቅዱሳን ላይ የቃላት ጦርነት ይከፍቱ ጀመር” ብለሀል። መደራጀት ለምን? የቤተክርስቲያን ልጆችን ለማሳደድ? ፓትርያርክን ለማውረድ? የመንግስትን ስልጣን ለመያዝ? መልስ ይኖርህ ይሆን? አይመስለኝም። ይህንን የአቦይ ስብሃት ንግግር ለማርከስ በማሰብ ባለቤትና ማሰሪያ አንቀጽ ባልተስማማበት አረፍተ ነገር “ቤተክርስትኒቷ ጌታ በወንጌል ‹‹ አይችሉሽም›› ተብላለች ፡፡”ብለሀል። ችግራችሁ ይሄ ነው። በቤተክርስቲያንና በማህበራችሁ መካከል ያለውን ልዩነት አታውቁም ለእናንተ ቤተክርስቲያን ማለት 20 አመት ያልሞላው የጽዋ ማህበር ነው። ኦርቶዶክሳዊነት ማህበረ ቅዱሳን መሆን ነው። መናፍቅነትም ማህበሩን መቃወም ነው። ከዚህ ያለፈ አመለካከት የላችሁም። ይሄ ጠባብ አመለካከታችሁ ነው፣ ሰውን ያህል ክቡር ፍጡር እንኳ ለመግደል የሚያስጨክናችሁ። እንዲህ ያለው ሀሳብ ነው ሰለፊያ ያሰኛችሁ። ሰው ስታሳድዱ ክርስትናን የኖራችሁት ይመስላችኋል። ስትገድሉ የማህበራችሁን ህልውና ያስቀጠላችሁ ይመስላችኋል። ያደረባችሁ የአጋንንት መንፈስ የቤተክርስቲያንን ህልውና አሳጥቶ ማህበራችሁን ቤተክርስቲያንን አድርጎ ያሣያችኋል። በዚህ ማንነት ታውራችሁ ህዝቡን “ከኛ የተሻለ መሪ አታገኝም። አባቶችን አትስማ ቤተክርስቲያንን አትስማ። እኛን ብቻ ስማ” ትላላችሁ። ይህን አስተሳሰባችሁን መቃወም ክርስቲያናዊ ግዴታ ስለሆነ ዝም ልንላችሁ አልቻልንም። ልብ ካላችሁ ልብ በሉ። 

በማህበራችሁና በቤተክርስቲያን መካከል ያለውን ልዩነት ተረዱ። ምን እንደሚያገናኛቸው እወቁ። ምን እንደሚለያቸውም ጠንቅቃችሁ ተረዱ። ለእናት ቤተክርስቲያን ቅድሚያ ስጡ። ይህን ካደረጋችሁ ለእውነት ወገን የምትሆኑበት ቀን ሩቅ አይሆንም።

                                                              ይቀጥላል