የሲኖዶሱ ስብሰባ ተጠናቀቀ

Click here to read in PDF

በልዩ ልዩ ድራማዎች የታጀበውና በስድብና በከፍተኛ የጥላቻ ስሜት የታጀበው የሲኖዶሱ ስብሰባ በትናንትናው ዕለት ተጠናቀቀ። የመዝጊያው ንግግር ራሱ ራሱን የቻለ ድራማ ተስተናግዶበታል።

በትናንትናው ጠዋት ውሎ የማኅበረ ቅዱሳን ጉዳይ እንደገና ያነጋገረ ሲሆን መተዳደሪያ ደንቡ እስኪሻሻል እስከ ጥቅምት ሲኖዶስ ስብሰባ ብቻ ከሰንበት ማደራጃው ተለይቶ በጠቅላይ ቤተ ክህነት ሥራ አስኪያጅ ሥር ሆኖ እንዲቀጥል ተወስኗል። አዳዲስ ጳጳሳት እስኪሾሙ ድረስም አቡነ ገብርኤል ቦረናን አቡነ ዮሴፍ ጅጅጋን ደርበው እንዲሰሩ ተወስኗል። አቡነ ሳሙኤል ከልማትና ክርስቲናዊ ኮሚሽን በተጨማሪ ትንሳኤ ዘጉባኤንና የቤተክህነት ቤቶችን ያስተዳድሩ የሚል ሀሳብ ቢቀርብም ገጠሩን እንኳ አይተውት ኣያውቁ ቦረና ቢሄዱ ምናለ? የሚል ሀሳብ በመቅረቡ ሁሉ ቀርቶ በልማትና ክርስቲያናዊ መምሪያ ብቻ እንዲያስተዳድሩ ተወስኗል።

የመዝጊያው ሥነ ሥርዓት አዲስ ድራማ ያስተናገደ ሲሆን ጋዜጠኞች ከተጠሩ በኃላ የሚነበበው ጽሁፍ እኛ ያዘጋጀነው ነው ብለው እነ አባ አብርሃም ከማኅበረ ቅዱሳን ቢሮ አስጽፈው ያመጡት መግለጫ እንዲነበብ በመፈለጋቸው መግለጫው ለሰዓታት ተጓቷል። ተጽፎ  የመጣው መግለጫ የማኅበሯን ጽድቅ የሚዘረዝርና ማኅበርዋ ለሀገርም ለቤተክርስቲያንምም ተቃሚ ስለሆነች ማንም ሊቃወማት አይችልም። የሚል ይዘት ያለው እግረ መንገድም መንግስትን ለመጎንተል ያለመ ነበር። ቅዱስነታቸው ግን በሲኖዶስ ስብሰባ ማጠቃለያ ላይ ስለአጠቃላይ የስብሰባው ሂደት ነው እንጂ ስለ አንድ ማኅበር አልዘግብም በማለታቸው መግለጫው የዘገየ ሲሆን በመጨረሻም መግለጫው ተሻስሎ እርሱን አንብበዋል።

 የዘንድሮው የሲኖዶስ ስብሰባ ከመቼውም ጊዜ ይልቅ መንፈስ ቅዱስ የራቀው በስድብና በእርግማን የታጀለ በጳጳሳት መካከል የነበረውን መከባበር ያጠፋ እንደነበር ታውቋል። በሲኖዶስ ስብሰባ ጳጳሳት ለመጀመሪያ ጊዜ አንተ አንተ ተባብለው የተነጋገሩ ሲሆን በተለይም ዘንድሮን የማያልፉ ይመስል በነገርና በአመጽ ልባቸው ተደፍኖ የነበረው የአባ አብርሃም ሁኔታ ግን እንኳን ጳጳስ በእንዲህ ያለ ጉባኤ ቢታደም ዱርዬ እንኳ የማያደርገውን ሥርዓት አልበኝነት አሳይተዋል ተብሏል። ጳጳሳትን አንተ እያሉ መሳደባቸውንም ደጀ ሰላም አድንቃና ተደንቃ አቡነ ፋኑኤልን “ከእኔና ከአንተ…” አሉ በማለት ዘግባልናለች።

ውግዘት የሚመለከታቸውን ትተን ውግዘት የማይመለከታቸውን የቤተክርስቲያን ልጆች በተመለከተ አባ አብርሃም  ሁለት ተልዕኮ ይዘው ተንቀሳቅሰዋል። የመጀመሪያው ማቅ የሰጠቻቸው ተልዕኮ ሲሆን እስዋም ሆን ብላ ቤተክርስቲያኒቱን አንፈልግም ብለው የራቁትን ወገኖች ቀላቅላ ቤተክርስቲያኒቱ ውስጥ ያሉትን ወገኖች ማስመታት ሲሆን ሁለተኛው ደግሞ የግላቸው ሲሆን እሳቸው የቅባት ሃይማኖት ተከታይ በመሆናቸው ማንኛውም የተዋህዶ አማኝ መናፍቅ ነው ስለሚሉ ከልባቸው የሚያምኑበትን የተዋኅዶ ልጆችን “ምንፍቅና” ማውገዝ በማንኛውም መንገድ ቢሆን ለውጥ ስለሌለው በመካከል ተደባልቀው የተጨመሩት ግለሰቦችና የማኅበራት ንጹህ መሆን አለመሆን ሳያስጨንቃቸው ይወገዙ ሲሉ ተደምጠዋል። የሚያሳዝነው የተዋኅዶ ልጆች ሆነው ሳለ ሰውየውን ተከትለው እስር ስር ሲሉ የነበሩት ሌሎች ጳጳሳት ጉዳይ ነው።

በዚህ የሲኖዶሱ ስብሰባ ከመቸውም ጊዜ በተለየ ሁኔታ በርካታ ጳጳሳት ስብሰባውን አቋርጠው የሄዱ መሆናቸውም ታውቋል። የአብኛዎቹም ምክንያት ስድብና እርግማንን እያዳመጥን መቀመጥ እንችልም የሚል ሲሆን እንዲያውም አንደኛው አባት መከባበርና መግባባት እንዲሁም መፈራራት የነበረበት የአባቶቼ ዘመን ናፈቀኝ ምነው ይሔንን ጉድ ሳላይ በተጠራሁ ኑሮ ሲሉ ተደምጠዋል። እንዲህ ያለ በግልጽ መንፈስ ቅዱስ ከራቀው ጉባኤ መታደም በራሱ የኃጢአቴ ቅጣት ነው። ሲሉም አክለዋል።

በርግጥም ጉባኤው መንፈስ ቅዱስ ራቀው እንደነበር ግልጽ ነው። እግዚአብሔርን ሰምቶ እግዚአብሔር የፈቀደው ይሁን ብሎ ለስብሰባ ከመግባት ይልቅ አድማ መትቶ እና ሴራ ሸርቦ እኔ ያልኩት ካልሆነ ጉባኤው ይታመሳል የሚሉ አባቶች ያሉበት ስብስብ መንፈስ ቅዱስ ከራቀው ከሚለው ውጭ ሌላ ምን መገለጫ ይኖረዋል? በጉባኤው ላይ ተገኝተው በሀሳቦች ላይ ተዋያይተውና እዛው ጉባኤው ላይ መወሰን እያቃታቸው ውሳኔውን ሆን ብለው ከማኅበረ ቅዱሳን ሰዎች እስኪማከሩበት ድረስ የሚያዘገዩ አባቶች የመንፈስ ቅዱስን ምሪት የሚጠብቁና የሚያምኑ ማለትስ ይቻላልን?

በቀደሙት አባቶች ይደረግ የነበረው የሲኖዶስ ስብሰባ ተጀምሮ እስኪያልቅ ደረስ በስብሰባው ላይ የሰው ሳይሆን የመንፈስ ቅዱስ ሀሳብ ብቻ እንዲፈጸም ከውጭ ሰው ጋር ያለመገናኘት አካሄድን ትተው ተጠሪነታቸውን ለቤተክርስቲያን ሳይሆን ለማቅ አድርገው ጠቅላላውን የስብሰባውን አካሄድ ለማቅ ሪፖርት እያቀረቡና ቤተክርስቲያን ከሰጠቻቸው ደረጃ ወርደው ከማህበሩ ሰዎች መመሪያ እየተቀበሉ ወደ ስብሰባ የሚሄዱ አባቶችን ስንመለከት ቤተክርስቲያን ምን ያህል ለሰማያውዊም አምላክ ሰማያዊ ሀሳብ መገዛት ፈተና የሆነባት ዘመን ላይ መሆንዋን እንገነዘባለን።