የማኅበረ ቅዱሳን አመራሮች ከገቡበት አጣብቂኝ ለመውጣት ወደፓትርያርኩ ቢሮ እግር አብዝተዋል

•     የማቅ ተከፋዩ አባ ኅሩይ ማኅተም ይዘው ተሰውረው ሰነበቱ

የማኅበረ ቅዱሳን ከፍተኛ አመራሮች ሰሞኑን ብፁዕ ወቅዱስ አቡነ ጳውሎስ ጽ/ቤት ወጣ ገባ ማለት ይዘዋል። ምንጮቻችን እንደጠቆሙት የማቅ አመራሮች የሚመላለሱበባቸው ሁለት ዋነኛ ጉዳዮች አሉዋቸው። የመጀመሪያው ከአባ ሠረቀ ብርሃን ጋር በዋናነት ያጣላቸውና “ሂሳባችሁን አስመርምሩ። ያላችሁን የገንዘብ ዝርዝር አሳውቁ። ገንዘብ አጠቃቀማችሁ ግልጽና ተጠያቂነት ያለው ይሁን።” የሚለው አጀንዳ እንደገና ስለተቀሰቀሰ እሱ “አይሁን አይደረግብን” ለማለትና የቅዱስነታቸውን ልብ ለማራራት ነው። ሁለተኛውና ዋነኛው ደግሞ ቅዱስነታቸው የማህበሩ አመራሮች በጠቅላይ ሚኒስትሩ የተሰጣቸው የግብር ስም ከሰለፊያ ዝቅ ያለ እንዲሆን ጠቅላይ ሚኒስትሩን ለማነጋገር ፓትርያርኩ መንገድ እንዲያዘጋጁላቸው ለመጠየቅ ነው።

ሁልጊዜም “ለእውነትና በእውነት” እሰራለሁ የሚል ድርጅት ሊያስደነግጠው የማይገባ “ሂሳባችሁን አሳውቁ፤ አጠቃላይ የሂሳብ እንቅስቃሴያችሁን ኦዲት አስደርጉ” የሚለው ጥያቄ የማህበሩን አመራሮች ለምን እንደሚያስደነግጣቸውና ይህን ጥያቄ ለመጠየቅ የሚደፍረውን ሰው ሁሉ ደግሞ “ተሐድሶ” እያሉ ለመጥራት እንደሚያስቸኩላቸው ብዙዎችን ግራ እያጋባ ነው። እውነት በቀኝም አዩዋት በግራ፣ በፊት ለፊትም አዩዋት በጀርባ፣ አዙረውም አዩዋት ገልብጠው ያው እውነት ናት። ስለዚህ “እውነትን ይዣለሁ” የሚል ሁሉ ምንም ነገር አያስፈራውም። ሂሳብህን ኦዲት ላድርግ የሚል የበላይ አካል ሲመጣማ “የአሠራሬን ትክክለኛነትና እውነተኝነት ለማረጋገጥ የምችልበት መንገድ አገኘሁ ብሎ” በደስታ ነው የሚቀበለው።

ማኅበረ ቅዱሳን ይህን ጥያቄ አጥብቆ ለምን ይፈራዋል? በግልጥ እንደታወቀው ማኅበሩ እንደ ጣልያን ማፍያ ዓላማውን ለማሳካት ሁለት ዓይነት መንገድ ይጠቀማል። የመጀመሪያው ሕጋዊ መንገድ ሲሆን በዚህ መንገድ ብዙም አይራመድም። አሠራሩ በአብዛኛው ሕጋዊነት ስለሚጎድለውና በብርሃን ከመመላለስ ይልቅ በጨለማ መሄድን ስለሚመርጥ በፍጥነት ከዚህ መንገድ ወጥቶ ወደ ዋናው መጓዣው ወደ ሕገ ወጥ መንገድ ይገባል። ማንኛውንም ነገር እንደ ክርስቲያን “የእግዚአብሔር ፈቃድ ከሆነ ይሳካል” ብሎ ሳይሆን “እኔ ከፈለኩት መሳካት አለበት” በሚል እምነት የሚንቀሳቀስ ድርጅት ስለሆነ ሀሳቡን ለማሳካት ሕጋዊው መንገድ አላዋጣ ሲለው ሕገ ወጡን መንገድ አጥብቆ ይከተላል። ይህም ጉቦ በመስጠት፣ ቁልፍ ቦታ ላይ አሉ የተባሉ ሰዎችን ከቦታቸው እስኪነሱ ድረስ ቋሚ ተከፋይ በማድረግና ዓላማው በሁለቱ መንገድ እንደማይሳካ ሲገባው ደግሞ ዱርዬ በገንዘብ ገዝቶ በማስፈራራት ሀሳቡን ለማስፈጸም የሚፈልግ ማፍያ ድርጅት ነው። ይህ አካሄድ ታዲያ ከፍተኛ ገንዘብ የሚጠይቅ ስለሆነ የአሰራር ግልጽነትና ተጠያቂነት ከሰፈነ ያሰበውን ማሳካት አይችልም። ስለዚህ ይህ የአሰራር ግልጽነትና ተጠያቂነት እንዲኖር የሚቀርብለትን የተቀደሰ ሐሳብ እያመከነ ጥያቄውን የሚያነሳበትን ሰው መርዞ በመያዝ ከቦታው እንዲነሣ እስከማድረግ የደረሰ እርምጃ በአመፅ መንገድ ከመውሰድ ወደኋላ አይልም። እንቅልፍም አይወስደውም። በአባ ሠረቀ ላይ የተከፈተባቸው የስም ማጥፋት ሥራ ለዚህ በቂ ማስረጃ ነው።

ይህ የግልጽነትና የተጠያቂነት አሰራር ተፈጻሚ እንዳይሆን የሚፈለግበት ሌላም ምክንያት አለ። የማህበሩ አመራር (ስውሩም ግልጹም) አባላትና አንዳንድ ለተንኮል ሥራ የሚፋጠኑ “ትጉህ” አገልጋዮቹ ለእንቅስቃሴያቸው መሳካት የሚያስፈልገውን ገንዘብና ለአንዳንዶቹ ከመሰረታዊ ፍልጎት አልፎ ኑሮ መደጎሚያ እንዲሆን በህገ ወጥ መንገድ ከማህበሩ የሚወጣውን ገንዘብ ግልጽነት ያለው አሰራር ስለሚያስቀርባቸው የሚያስፈልገውን ሁሉ ዋጋ መክፈል የህልውና ጥያቄ ስለሚሆንባቸውም ነው።

ታዲያ ሰሞኑን በአቡነ ገሪማ ፊርማ የሰንበት ትምህርት ቤት ማደራጃው ይህን ጉዳይ መልሶ እንዲያንቀሳቅስ ሲጠየቅ፤ አሜሪካ ከነበሩበት ጊዜ ጀምሮ በፍቅረ ንዋይ የሚታሙትና በቅርቡ ከስጦታና ከእጅ መንሻ ገንዘብ ተላቀው የማኅበሩ ቋሚ ተከፋይ ወደ መሆን የተሸጋገሩት አባ ኅሩይ ጉዳዩን ለማኅበረ ቅዱሳን ከፍተኛ አመራሮች ሹክ ይላሉ። የማህበሩ አመራር አባላትም ይህ “እንቅልፍ የሚነሳ” ጉዳይ ካሉበት ቦታ አሰባስቦአቸው ወደ ቅዱስነታቸው በመግባት “ይህ አይሁንብን አይደረግብን” የሚል ጥያቄ ያቀርባሉ። ቅዱስነታቸውም የሁሉም አባት እንደመሆናቸው በሚያጽናና ቃል ጉዳዩን መልሰው እንደሚያዩት ሲነግሩዋቸው ደስታው አላስቀምጥ ብሎአቸው ምክንያት ሲፈልጉ፣ ከተቀበሩ ሁለት ሳምንታት ያለፋቸውን የቅዱስነታቸውን ወንድም ሞት እንደጥሩ አጋጣሚ ተጠቅመው የእዝን እራት እናበላንን ብለው እራት አብልተው ነገሩን አብስለነዋል ብለው ሁለተኛ ጉዳያቸውን ደግሞ እንዴት እንደሚያሳኩት በማሰላሰል ይሄዳሉ።

ቅዱስነታቸውም ነገሩን ሲያስቡት ኦዲት የመደረጉና ሂሳብ የማሳወቁ ክፋት ስላልታያቸው ደብዳቤው እንዲወጣ ያዛሉ። ይህን ትዕዛዝ የሰሙት አባ ኅሩይ ከመዝገብ ቤት ማህተም ተቀብለው (በትክክለኛው አገላላጽ ሥልጣናቸውን ተጠቅመው በመስረቅ) ከግቢው ወጥተው ይጠፋሉ። ይህ እንደታወቀም ማህተሙ ሌላ ወንጀል እንዳይፈጸምበት በሚል ለፖሊስ ተነግሮ ፍለጋ ተጀመረ። ፖሊስ እንደሚፈልጋቸው የተረዱት አባ ኅሩይም አመሻሽ ላይ የጠፋሁት አቡነ ገሪማ ስላዘዙኝ አዝኜ ነው በማለት ማኅተሙን መለሱ።

ለመሆኑ ግን የብፁዕ አቡነ ገሪማ ሥልጣን አባ ኅሩይን ለማዘዝ ያንሳልን? ሌሎች ስልጣንና ኃላፊነታቸው ሣይጨመሩ የብጹዕ ወቅዱስ ፓትርያርክ ልዩ ጽ/ቤት የውጭ ግንኙነት የበላይ ኃላፊ መሆን አንድ የሰንበት ማደራጃ ኃላፊ አልታዘዝም የሚለው ስልጣን ነው ወይ? የሚሉትን ጥያቄዎች መልስ ለአባ ኅሩይና ለመካሪዎቻቸው እንተወዋለን?

ሁለተኛውና በእጅጉ ይፈልጉት የነበረው ጠቅላይ ሚኒስቲሩን የማግኘት ጉዳይ ለጊዜው ስለአልተሳካ “ከሕገ ቤተክርስቲያን ውጪ ቢሆንም በበዓለ ሃምሳ (ጰራቅሊጦስ) ይዘነው የነበረው ጾም ጸሎት አልተሳካም።” በማለት ቁዘማ ላይ መሆናቸውን ውስጥ አዋቂ ምንጮቻችን ገልጸዋል።

አንዳንድ ወገኖች ከመንግሥት የተሻለ ሥራ እየሰራን ስለሆነ ነው መንግስት ጠምዶ የያዘን (አንድ አድርገን ሚያዚያ 17 ፤ 2004 ዓ.ም፤ መንግስት ለምን ‹‹ማህበረ ቅዱሳንን›› ጥምድ አድርጎ ያዘው?) በማለት በብሎጎቻቸው እየጻፉ ስለሆነ ለምን አሁን የገጠማቸውን ችግር ለመፍታት እራሳቸውን ባዩበት መነጽር ልክ አይሞክሩም እያሉ ይገኛሉ። ይኸውም “ካንተ የተሻለ ስራ እየሰራን ስለሆነ ይህን አለአግባብ የሠጠኸንን ስም በአስቸኳይ እንድታስተካክል እንደራደር አለበለዚህ ለአንድ ዓመት እጃችንን አጣጥፈን የምንመለከትህ ይሆናል ቢሉ መንግሥት ፈርቶና ደንግጦ በአስቸኳይ እሺ ይላል የምን በቅዱስነታቸው በኩል እየሄዱ መንገድ ማርዘም ነው” ሲሉ የማህበሩን አመራሮች  በስላቅ እየተቿቸው ይገኛሉ።